Menu

IX pregunta a los socialistes con quién hai que falar y sobre qué.

Izquierda Xunida observa con preocupación y desconciertu cómo'l Gobiernu paez adelantase a la propia FSA..

UVIEÚ, 28/08/2008.- Izquierda Xunida observa con preocupación y desconciertu cómo'l Gobiernu paez adelantase a la propia FSA. Nun recibimos tovía nenguna invitación pa sentanos na mesa y el Gobiernu emprendió la carrera del presupuestu, recurriendo a los medios de comunicación pa dalos a conocer. Nun paez una forma d'actuar seria cuando se pretende poner en marcha un procesu de diálogu. Amás, recuérdanos el "modus operandi" d'Areces na negociación del presupuestu del 2008, nel que mientres Rabanal nos remitía documentos ensin númberos, al día siguiente conocíemos les cifres y les inversiones detallaes pola prensa.

Negociar unos presupuestos supón, ineludiblemente, afitar previamente unos oxetivos políticos, determinar les grandes llínies d'actuación pal Gobiernu. Dempués, y sólo dempués, debe acordase qué inversiones son necesaries, qué programes d'actuación son importantes y  qué recursos deben tener.

El Gobiernu tomó la la salida en solitariu y paez tentáu a danos la so propuesta de presupuestos en cómodes entregues al traviés de los medios de comunicación. Sedría un grave error continuar per esti camín. Areces nun debe dir por llibre. Ye más, sentímonos obligaos a preguntanos con quién hai que falar y de qué temes quieren falar los socialistes.

Mientras Javier Fernández anunció un diálogu ensin llímites, Areces paez empeñáu en llimitalo al presupuestu.Izquierda Xunida espera que la FSA garantice un proceso serio. Si realmente apuesten por un diálogu ente la izquierda p'avanzar les posibilidaes de garantizar una mayor estabilidá institucional deben, en primer llugar, abandonar l'inmovilismu de les últimes selmanes y mover ficha. IX sigue ensin recibir nin tan siquiera una carta formal proponiendo una reunión cola dirección socialista.

La lentitú de la FSA contrasta cola ansiedá del Gobiernu. Si Areces opta por aplicar la política económica de la drecha, si mantién les rebaxes fiscales a ricos y les ayudes indiscriminaes que nun tienen en cuenta los ingresos, tará dilapidando recursos públicos mui necesarios en tiempos de crisis y tará subordinando l'interés d'unos pocos al de la mayoría.