IX albidra que lo peor de la crisis ta por llegar y recuerda al Gobiernu la so obligación de prever midíes concretes énte los problemes de la xente.
UVIÉU, 24/08/2008.- Izquierda Xuida espera que'l Gobiernu asuma la so responsabilidá y faiga públiques les sos propuestes p'afrontar la crisis. L'executivu d'Areces nun pue mirar a otru llau énte los problemes de la xente, tien que tar a l'altor de les circunstancies y anticipase a los problemes. Hasta'l momentu nun foi asina y sigue abellugándose nel autismu énte la crisis. Ye esmolecedor que'l Conseyeru d'Economía se llimite a facer de contable mayor, renunciando a la so obligación, como miembru del Gobiernu, que ye, proyectar midíes énte la crisis y recoyeles nel presupuestu del próximu añu.
IX observa con preocupación la falta d'iniciativa política del Gobiernu d'Areces porque ta convencida que lo peor de la crisis ta por llegar y siguen cruzaos de brazos. Ye previsible que nos próximos meses se produzan despíos colectivos y la rempuesta del Gobiernu foi, tradicionalmente, la inesistencia de midíes pa da-y rempuesta a estes situaciones. Agora tien la oportunidá, y la obligación, d'analizar toles posibilidaes, anticipase y prever acciones concretes.
El Gobiernu asturianu tien de baxar a l'arena, abandonar l'ambigüedá y esplicar les sos propuestes. Los asturianos tienen el drechu de conocer qué va facer el Gobiernu enante los sos problemes. ¿Qué midíes tien el Gobiernu pa crear emplegu pa mozos, muyeres o mayores de 45 años?, ¿qué iniciatives tien pa los autónomos?, ¿piensa apostar pol salariu social pa incrementar les pensiones más baxes?, ¿seguirá coles ayudes indiscriminaes o va crear más places públiques nes Escueles de 0 a 3 años?, ¿va poner en marcha nueves ayudes pa evitar que les hipoteques afueguen a munches families con escasos recursos?, ¿mantendrá les privatizaciones o apostará polos servicios públicos de calidá? Son dalgunes de les preguntes pa les que'l Gobiernu da la callada por respuesta.
Izquierda Xunida, nes últimes selmanes, fizo un conxuntu de propuestes concretes énte la crisis. Midíes empobinaes a garantizar más izquierda nel Gobiernu pa diversificar l'actividá económica, crear emplegu, favorecer l'accesu a la vivienda y garantizar más inversión social. Pa ello reclama al Gobiernu la máxima austeridá; reducir el númberu d'altos cargos; eliminar los sobrecostos; garantizar mayor control y tresparencia nos grandes proyectos culturales y audiovisuales; o poner fin a les rebaxes fiscales, que sólo beneficien a los ricos. D'esta forma dispondráse de más recursos económicos pa financiar midíes contra la crisis. L'executivu asturianu nun pue mirar a otru llau mientres la xente tien cada vegada más dificultaes pa llegar a fin de mes. Hai qu'afrontar la crisis dende la izquierda.
Diputáu Autonómicu y Coordinador d'IX
Diputado Autonómico
(Mas Asturies)
Diputada Autonómica
Convocatoria por Asturies