Menu

El voceru d'IX refuga les acusaciones de la diputada del PP Enma Ramos sobre la contratación de los monolitos que, añedió, tán llistos p'allugase

El voceru d'IX nel Parlamentu d'Asturies, Ángel González, reclamó güei la reactivación del plan pa la señalización de les fueses comunes n'Asturies, atayáu tres la salida d'IX del Gobiernu d'Asturies. González, aseguró qu'al respective de la instalación de los monolitos conmemorativos, nun hai nenguna novedá, salvu, dixo, "que se suma al boicó de la llei de memoria histórica, del Partíu Popular, que la incumple reiteradamente en toa España. Sumóse'l FORU nel momentu que nos sustituyó a nós, y yá lleva un añu'l Gobiernu Socialista y nun sabemos a qué ta esperando pa siguir faciendo lo que trai la Llei; ente otres coses, el llistáu ta publicáu dende va bien de tiempu na páxina web del Principáu, diz onde tán les fueses, con un mapa que de la mesma foi aprobáu pol Gobiernu d'España".

Ángel González refugó les declaraciones de la diputada del PP Enma Ramos, nes que, na so opinión, trata d'aburuyar la realidá sobre lo que foi'l procesu de compra ya instalación de los monolitos conmemorativos. "Descalificar por sigo mesma: equí nun hai nin nenguna clase de timu, nin nenguna clase d'estafa, faltaría más, lo que pasa ye que los sos problemes de ser interventora xeneral con FORO empiecen a pasa-y factura: esta señora siendo interventora xeneral del Principáu tuvo conocencia del informe de la Sindicatura de Cuentes, del informe provisional qu'aludía a delles coses, ente elles a ésta, y nun dixo nin una palabra, nin escribió nada. Podía dicir qu'había dalguna irregularidá alministrativa, siquier dende l'ámbitu alministrativu. Nun dixo nada. Polo tanto qu'agora diga estes coses arreyando a persones particulares acusándoles de delitos, ta metiéndose nun xardín absolutamente imposible de sustentar. Eso ye a cencielles un llevantu, una falsedá, porque esos monolitos como se sabe esisten, los medios de comunicación haber publicáu, consta nos documentos, otra cosa ye que los gobiernos tuvieren voluntá del so allugamientu. Esisten, tán fabricaos, a puntu a cencielles p'asitialos como se fixo nel so día, per parte d'esi empresariu, que figura en tola documentación. Hai otros ánimos políticos qu'ende nun voi entrar, per parte del PP, que si tien que tapar otres coses, nun va cuntar cola nuesa collaboración".