Vamos esperar al llunes pa que'l Gobiernu apurra una solución. El PP y el PSOE tienen una mayoría peramplia pero nel plenu nun pueden aprobar una illegalidá
Ángel González, voceru parlamentariu d'IX na Xunta Xeneral, demanda al Gobiernu asturianu que rectifique darréu los erros que desvelen los informes de técnica lexislativa sobre les trés últimes lleis de creitu roblaos pol Lletráu Mayor de la Xunta Xeneral del Principáu, de los que s'esprende que les mentaes normes nun s'afaen a la llegalidá. IX, aseguró'l voceru y presidente per edá de la ponencia qu'estudia les lleis, nun tener cuenta de frenar la tramitación de les lleis y espera poder cumplir el cronograma marcáu siempres que'l Gobiernu igüe la tramitación, d'ende que pidiera treslladar la ponencia hasta'l próximu llunes, día 21. “Vamos Esperar al llunes por que'l Gobiernu apurra una solución. El PP y el PSOE tienen una mayoría peramplia pero nel plenu nun pueden aprobar una illegalidá”, alvierte'l diputáu d'IX.
Ángel González noma de “verdaderamente sorprendente” que'l Gobiernu tramite estes lleis d'esta manera y calificalo de “inaudito” . “Pretender que'l Parlamentu apruebe unes lleis illegales ye una cosa que supera la rareza”, alvierte'l diputáu d'IX, non ensin ironía. Dicimos esto, sigue, porque'l Lletráu Mayor diz que l'espediente que fixo'l Gobiernu pa la llei que plantega 76 millones pa l'amortización de delda va contra la llei del Testu Refundíu del Réxime Presupuestariu. Per otru llau, l'informe sobre la llei pal pagu de provisores, diz que nun se puede aplicar a pagar provisores porque yá'l Gobiernu'l día 28 de xineru acutóse esi dineru pa esa función, roblando un creitu col ICO, adelantrando parte de la delda, colo cual agora sería una delda ordinaria. Sobre esti últimu aspeutu, IX sigui demandando lo mesmo que la selmana pasada: “que nos digan a qué van destinalo concretamente pa poder opinar y enmendar nel so casu”. ..IX tamién quier saber por qué si va un mes que ta robláu'l pagu a provisores el Gobiernu nun empecipia a executalo y siguen calteniendo qu'ésti dineru precisabase pa paga-yos, como dixo nel plenu de la selmana pasada. Nel casu de la llei de 109 millones d'euros tamién diz qu'hai un suplementu de creitu que nun ye llegal porque a cencielles ye una ampliación.
Diputáu Autonómicu y Coordinador d'IX
Diputado Autonómico
(Mas Asturies)
Diputada Autonómica
Convocatoria por Asturies