Menu

Un total de 9 organizaciones xuntáronse a l'Asamblea Ciudadana pro Referéndum d'Asturies, que quedaba constituyida formalmente fai apenes unos minutos. Este ye'l primer pasu ya inda s'espera que nes próximes selmanes otros colectivos sumense a la iniciativa cola que pretenden recoyese firmes pa favorecer la consulta sobre'l modelu d'Estáu.

El coordinador xeneral d'IX Asturies, Manuel González Orviz, resumía l'oxetivu de la plataforma en llograr que la ciudadanía pueda espresar, llibremente, la so opinión sobre'l caltenimientu de la monarquía o la instauración d'una república, llantandose frente a lo que denominó “procesu de restauración borbónica” apautáu por PP y PSOE. Tratase de someter al conxuntu de la ciudadanía, dixo, “qué réxime queremos. Si queremos una monarquía o una república”.

Orviz esclarió que, al falar de república, la Plataforma refierse non yá al modelu de la xefatura del Estáu sinón al propiu Estáu, que tien de ser, añedió “federal, solidariu y que, por tanto, cuando falamos de la república tamos falando de garantizar los derechos sociales, políticos, llaborales, más democracia, más llibertaes”.

En resume, concluyó'l máximu responsable d'Izquierda Xunida, “de lo que se trata ye de devolver la soberanía al pueblu, allá como se fixo na Revolución francesa, porque cuando se falaba de poder y soberanía falabase del pueblu, non como agora que cuando se fala de poder falase de los bancos y cuando se fala de soberanía falase de los reis”.

La necesidá d'esta consulta espeyase, según una de les organizaciones fundadores n'Asturies de l'Asamblea, en qu'un 70% de los ciudadanos nun tuvieron la oportunidá d'aprobar la constitución vixente.

Les organizaciones firmantes son Lázaro Cárdenes, Alternativa Socialista, Partíu Comunista d'Asturies, Sociedá Cultural Xixonesa, Foru Republicanu Canguetu, Atenéu Republicanu d'Asturies, Izquierda Abierta, Izquierda Xunida ya Izquierda Xunida Mocedá.