Menu

Aurelio Martín, voceru del grupu parlamentariu d'IX na Xunta Xeneral, espera que'l Gobiernu asturianu dea esplicaciones sobre porqué inda nun fixo l'aportación económica comprometida a la Sociedá Xixón Al Norte y cuándo tien previstu apurrir la so cuota del préstamu participativu que va significar poner en marcha l'adecuación de los terrenos del plan de víes, más conocíos como El Solarón.

Martín rexistró esta mañana dos tales entrugues al Conseyu de Gobiernu, tres les informaciones publicaes, coincidiendo col entamu del valtamientu de l'antigua estación de la Güelga.

El voceru del grupu parlamentariu d'IX alvierte de que “la integración del ferrocarril en Xixón ye tan necesaria y urxente como lentes son les distintes alministraciones pa cumplir col oxetivu global fitu”. Martín considera imprescindible que nun se sigan atropando más retrasos y entaínen el conseñamientu de les cantidaes comprometíes, 750.000 euros, pa faer  frente a l'adecuación de los terrenes del plan de víes.

Estes entrugues xúnense a la Proposición  Non de Llei qu'IX yá rexistró pa esixir el pronunciamientu de tolos grupos asturianos sobre Xixón al Norte na Xunta Xeneral.  Ésta va ser aldericada nes próximes y encamienta a toles alministraciones públiques a aunir esfuerzos, na midida de les  sos posibilidaes y competencies, ante l'escarniu”  que supon pa la ciudá tener un túnel acabáu dende 2006 ensin usu y  con un costu de más de 100 millones d'euros. La iniciativa d'IX pidi al Gobiernu asturianu a liderar xuntu al Conceyu de Xixón una negociación col Gobiernu d'España pa la puesta en marcha del Plan d'Integración del Ferrocarril en Xixón y la construcción d'una estación intermodal. Diches actuaciones tendrán de tener, a xuiciu d'IX, una memoria económica col detalle de les inversiones que correspuendan a caúna de les alministraciones, según un calendariu d'execución de les mesmes.