Menu

El responsable federal d'Enerxía d'IX, Adolfo Barrena, asegura que “nengún territoriu del Estáu ta en vienta y nun puede vencese el refugu social a esta peligrosa técnica con promeses económiques”

Izquierda Xunida denuncia, al traviés del so responsable federal d'Enerxía, Adolfo Barrena, el postreru y descaráu sofitu del Gobiernu del PP a la estensión de la técnica de quebrar hidráulica (fracking). Ante ello, “reclamamos al Executivu de Mariano Rajoy la retirada del anteproyectu de llei presentáu pol ministru d'Industria, José Manuel Soria, pa modificar l'actual Llei d'Hidrocarburos y que tome les midíes oportunes por que tou l'Estáu español sía territoriu llibre de fracking”.

“Rescampla -avisa Barrena- qu'esta reforma de la Llei d'Hidrocarburos lo qu'escuerre ye facilitar la implantación del fracking en tol Estáu y pretende, pa ello, anidiar el mayoritariu refugu social, ciudadanu, institucional y políticu esistente escontra esta agresiva técnica ambiental”.

El responsable d'Enerxía d'IX señala que “el titular d'Industria asitia na nueva redacción d'esta norma'l ‘señuelo’ d'un nuevu tributu a les esplotaciones y estracciones de petróleu y gas al traviés del fracking pa compensar supuestamente a les comunidaes autónomes, conceyos y titulares de los suelos onde se desenvuelvan los proyectos. Esto nun ye más qu'un intentu de ‘mercar voluntaes’ polítiques al traviés d'una supuesta medría d'ingresos”.

“El ministru Soria nun tien nengún reparu en ‘vender’ cola hipocresía política propia d'esti Gobiernu la so propuesta so la sida de qu'esti nuevu impuestu va dexar qu'una parte de los recursos que xenere esta peligrosa actividá ‘revierta nes comunidaes autónomes o entidaes locales onde tengan llugar y, si ye nel mar, a la comunidá más próxima al llugar de les estracciones”, detalla Barrena.

Adolfo Abarrena alvierte de que “nun ye aceptable que Rajoy, con Soria d'ariete, póngase una vegada más del llau de les multinacionales del petróleu, ignore los munchos riesgos y peligros del fracking, una práctica sometida en toa Europa a una moratoria”.

“Nengún territoriu del Estáu ta en vienta. Non puede vencese el refugu social a esta técnica con promeses económiques. Dende IX vamos siguir al llau de la ciudadanía col nuesu sofitu a les plataformes antifracking, na defensa del nuesu territoriu frente a estes agresiones ambientales que, amás, son un riesgu pa la salú pública, pa les nueses agües y pa la nuesa agricultura”, añede'l dirixente federal