Menu

Dambos partíos balten la enmienda a la totalidá del presupuestu roblada pola coalición

PSOE y PP executaron güei nel plenu de la Xunta Xeneral el so pactu pa baltar la enmienda a la totalidá al presupuestu presentada por Izquierda Xunida, rematando asina'l xiru copernicanu entamáu polos socialistes nel últimu añu. Asina lo esplicó Aurelio Martín, voceru d'IX na Xunta Xeneral, que nun reprochó l'alcuerdu, sinón el conteníu del mesmu, la orientación de la política presupuestaria, económica y fiscal que se deriva del mesmu. A xuiciu d'Aurelio Martín, con esti alcuerdu Javier Fernández nun va dar por rematáu'l ciclu hexemónicu de la derecha, sinón que la derecha llogró que los socialistes gobiernen col so programa.

Nel analís realizáu, Aurelio Martín alvirtió que'l PSOE n'Asturies abandonó los   sos propósitos iniciales y xuntáronse casi ensin matices a les polítiques económiques y fiscales del Gobiernu del Partíu Popular. Ente estes propuestes de principiu de llexislatura, reprochó Martín, atópase la reforma electoral,  el   cambéu del sistema d'elección del Presidente y  el tresformamientu institucional pa que pudiera entrar la lluz en toos y caún de los rincones de la xestión política. “De la reforma electoral y la de la llei del presidente, nada, y de tresformamientu electoral casi nada tampoco”, esplicó Martín a la conseyera de Facienda, que foi quien defendió'l presupuestu pa 2015, que xube a 3.959 millones d'euros.

De la mesma, alvirtió de que'l compromisu inicial por caltener el modelu de bienestar construyíu nos últimos años, la llucha contra'l desempléu y por caltener intacta la calidá y cantidá de los servicios públicos esenciales fueron abandonaos tamién. “Prefirieron ustedes abrazase al PP antes de cumplir los compromisos qu'adquirieren coles ciudadanes y ciudadanos d'Asturies nesta cámara”, refirió Martín. La razón, a xuiciu de Martín, que llevó al PSOE a incumplir la so propia propuesta ye'l mieu que se-yos metió nel cuerpu de resultes de les resultancies de les pasaes elecciones europees”, esplicó.

Martín aprofió que'l proyectu presupuestariu nun dexa resolver el grave problema de desemplegu que sufre Asturies nin llinda l'esmantelamientu progresivu de la industria rexonal nin consolida tampoco los servicios públicos en materia de bienestar social, vivienda, probeza enerxética ya infantil, sanidá o educación.

Nesti contestu, los presupuestos apautaos por PP y PSOE sirven namái, según Martín, pa baxar los impuestos de forma que, de cara a 2017, Asturies va recaldar 38 millones d'euros menos que se van sumar a los 60 millones más que'l Principáu va dexar d'ingresar de resultes de la reforma fiscal aprobada pol Gobiernu central.

“Baxar los impuestos, y más nestes circunstancies, non yá nun ye d'esquierdes sinón que nin siquier ye sensatu. Usté saber y yo lo se”, señaló'l voceru d'IX a la conseyera Dolores Carcedo a la qu'alvirtió de que, si nel futuru pénase como lo fai agora'l PSOE de reformar l'artículu 135 de la Constitución, “entós yá va ser demasiáu tarde”.