Menu

Dambos partíos balten toles enmiendes de la coalición

Los grupos parlamentarios de PSOE y PP na Xunta Xeneral sumaron esta mañana los sos votos pa baltar les 34 enmiendes parciales d'Izquierda Xunida. Aurelio Martín, voceru parlamentariu na Xunta Xeneral, llamentó l'actitú del PP y PSOE que pasaron el rodiellu bipartidista a tou tipu d'enmiendes, de bien distinta índole: referíes a la meyora de l'actividá granible, l'amenorgamientu de les llistes d'espera del salariu social o d'espera quirúrxica o la meyora d'infraestructures.  “Desgraciadamente nun consideraron nin una sola enmienda, yera un guión escritu, el d'un presupuestu que respuende más a la estratexa de los dos partíos qu'a les necesidaes reales d'Asturies pa combatir el desemplegu, pa faer otra política más social, mas medioambiental o de mayor inversión nos conceyos”, declaró Martín. Al so xuiciu, predominó      un alcuerdu que tien como oxetivu pa los dos partíos llegar a les meyores condiciones a les elecciones. “Ye un alcuerdu que nun tien precedentes, y que dicen faer por responsabilidá, anque si asina fora tendríen d'esplicar  por qué nun lo fixeron l'añu pasáu. En palabres de Martín l'únicu cambéu qu'hubo d'un añu a otru fueron  les elecciones europees y encuestar elecciones que dan un fondu cambéu nel panorama electoral. “Eso ye lo que llevó a los dos partíos a faer un alcuerdu de mínimos, pero onde'l PSOE, desgraciadamente asume una bona parte de la política del PP, amenorgando impuestos a les clases más altes. Son ellos los que van tener dar esplicaciones”, concluyó Martín nel resume d'esta xornada.  

La diputada Marta Pulgar, encargada de defender les enmiendes parciales, realizó una repasada d'éstes.  De calter granible IX defendió una enmienda de dos millones d'euros pa la meyora de les esplotaciones ganaderes, porque quedaron 240 solicitúes ensin respuesta económica anque cumplíen colos requisitos; una pa frenar la probeza enerxética dotada con  1,9 millones d'euros pa desaniciar les necesidaes enerxétiques de les families con escasos recursos y ente les enmiendes sobre medioambiente tán 200.000 euros pa reforzar el Plan calidable del Aire

Amás d'estes, IX plantegó una enmienda que pretendía que cualquier tresformamientu de les places vacantes destínense prioritariamente a poner en marcha los servicios públicos pindios d'entrada en serviciu per falta de personal y garantizar qu'estos servicios públicos destínense a la fin pal que fueron diseñaos. Destinaes a la RTPA, IX defendió dos enmiendes. La primera pretendía ameyorar el so financiamientu, claramente insuficiente, con una medría de 1.000.000 d'euros. La segunda yera pa que la puesta en marcha d'esta nueva empresa nun naza lastrada pola delda procedente del Ente Públicu de Comunicación.

Nel apartáu d'infraestructures IX plantegaba: 2.000.000€ de medría pal soterramientu de les llínees ferroviaries de Llangréu p'algamar un presupuestu cercanu a 12 millones d'euros que dexe avanzar sustancialmente anguaño na so conclusión; un millón d'euros  pal acondicionamientu integral del AS-313, demandáu tantu polos vecinos de la localidá uvieina de Trubia como los de Grau y 376.000€  pa la meyora de la vía LV-8 en Llaviana.

Establecíense una serie de partíes pa intervenciones en centros educativos del Principáu, concretamente los siguientes: 300.000 euros pa cubrir el patiu del Colexu Públicu de Ventanielles n'Uviéu; 160.000 euros pal techado de la cancha del Colexu Públicu El Cotu en SMRA; 150.000 euros pal entamu de la construcción d'un Institutu d'Enseñanza Secundaria en La Florida n'Uviéu; 600.000 euros pa la Escuela Infantil de Contrueces en Xixón.

Ente les 35 enmiendes d'IX tamién pretendíen establecer partíes pa la meyora de bienes d'interés cultural de distintes partes d'Asturies (Vienta del Frieru nel conceyu de Casu y Mayá de Los Casares nel de Sobrescobiu) y ameyorar sustancialmente el Plan del Prerrománicu, dotándolu con 500.000 euros