Menu

El grupu parlamentariu d'Ix-BA-Verdes presentó na Xunta Xeneral del Principáu una proposición non de Llei na que insta al Conseyu de Gobiernu a impulsar, de manera inmediata y en collaboración col Ayuntamientu d'Uviéu, la creación d'una comisión que decida   la futura utilización de los terrenos que queden lliberaos na ubicación d'anguaño del Hospital Universitariu Central d'Asturies y la so área urbanística d'influencia, incorporando nella, al menos y xunto con eses Administraciones, a la Universidá d'Uviéu, les asociaciones vecinales, sindicales y otres entidaes ciudadanes, y priorizando en tou casu'l desarrollu d'espacios y equipamientos públicos na zona. Del mesmu mou, la Xunta Xeneral del Principáu d'Asturies insta al Conseyu de Gobiernu a proceder nel so día a la tasación pericial de los citaos terrenos e informar de la mesma a esti Parlamentu, a los efectos establecíos na Llei de Patrimoniu del Principáu d'Asturies.

Los terrenos de El Cristo definirán la ciudá nos prósimos 30 años, asegura Alejandro Suárez, Coordinador d'IX d'Uviáu

El grupu parlamentariu d'Ix-BA-Verdes presentó na Xunta Xeneral del Principáu una proposición non de Llei na que insta al Conseyu de Gobiernu a impulsar, de manera inmediata y en collaboración col Ayuntamientu d'Uviéu, la creación d'una comisión que decida   la futura utilización de los terrenos que queden lliberaos na ubicación d'anguaño del Hospital Universitariu Central d'Asturies y la so área urbanística d'influencia, incorporando nella, al menos y xunto con eses Administraciones, a la Universidá d'Uviéu, les asociaciones vecinales, sindicales y otres entidaes ciudadanes, y priorizando en tou casu'l desarrollu d'espacios y equipamientos públicos na zona. Del mesmu mou, la Xunta Xeneral del Principáu d'Asturies insta al Conseyu de Gobiernu a proceder nel so día a la tasación pericial de los citaos terrenos e informar de la mesma a esti Parlamentu, a los efectos establecíos na Llei de Patrimoniu del Principáu d'Asturies.

La proposición non de Llei dada a conocer por Francisco Javier García Valledor, diputáu d'IX-BA-Verdes, y Alejandro Suárez, Coordinador d'IX d'Uviéu, enmárcase nel debate necesariu que debe producise pa decidir el futuru de los terrenos de El Cristo-Buenavista. Esta mesma selmana aconceyarán n'Uviéu el Conseyeru d'Infraestructures y Ordenación del Territoriu, Francisco González Buendía, y l'alcalde d'Uviéu, Gabino de Lorenzo.

Alejandro Suárez recordó que na ciudá esisten tres terrenos que tan sometíos a la presión de la especulación urbanística: los terrenos que ocupa y tendrán que siguir ocupando la fábrica de La Vega, los de la nueva Ciudad Naranco y los terrenos de El Cristo-Buenavista.

Suárez considera que si la invitación a soñar que fizo Álvarez Areces a los constructores sobre los terrenos de El Cristo se fai realidá pueden acabar xenerándose los monstruos de los sobrecostes. “El presidente ta nuna espiral obsesiva pa evitar la construcción de la ciudá de la xusticia en El Cristo, porque padez nestos momentos la necesidá acuciante de financiación polos sobrecostes del nuevu Hospital Central”, aseguró Alejandro Suárez.

La importancia de los tres terrenos mencionaos anteriormente, y mui especialmente, los de El Cristo, radica en que definirán l'Uviéu de los prósimos 30 años. La Proposición non de Llei quier la participación activa de tola sociedá ovetense, d'una forma tresparente y democratica, na definición urbanística de los terrenos de El Cristo. La zona de El Cristo, urbanísticamente percastigada, necesita zonas verdes, equipamientos públicos, vocación de xeneración económica y non nueva vivienda, la “obsesión de les administraciones autonómica y llocal que nestos momentos necesiten financiación”, esplicó'l Coordinador d'IX d'Uviéu.

El diputáu Francisco Javier García Valledor recordó la iniciativa aprobada na Xunta Xeneral na que se mandata al gobiernu a entamar la planificación de manera inmediata de la nueva ciudá de la xusticia n'Uviéu. Valledor entiende que se dieron dalgunos pasos nesta iniciativa, pero tamién reclamen que éstos sían p'alantre y non de forma dubitativa. “Creemos que ye indispensable que'l gobiernu del Principáu, propietariu d'esos terrenos cuente col Ayuntamientu d'Uviéu, a quien-y correspuenden les competencies de planificación y desarrollu urbanísticu, pero ye fundamental que tamién ten na comisión otros representantes institucionales y sociales”, dixo Valledor. Nestu sen, el diputáu d'IX-BA-Verdes  cree que l'urbanismu tien que ser democráticu y tresparente, y por ello deberíen incorporase a la comisión la Universidá d'Uviéu -na midía na que los terrenos colindantes-y pertenecen y porque diba ser buen momentu pa planificar les futures necesidaes del campus de El Cristo-, y les organizaciones vecinales, sindicales y ciudadanes pa rediseñar esti “Uviéu del futuru”.

Na iniciativa déxase abierta la posibilidá de que s'incorpore a la comisión l'administración del Estáu, ya que ye la propietaria, al traviés del Ministeriu de Defensa, de los terrenos onde ta asentáu el cuartel de la Policía en Buenavista. Nel diseñu previstu por IX-BA-Verdes inclúyese esti terrén pa xenerar más espacios públicos, treslladando esti cuartel vieyu a otros terrenos del Principáu, por exemplu a los que güei ocupen toles instalaciones de seguridá en La Morgal, xenerando un complexu más ambiciosu averáu a la seguridá pública.

La proposición non de llei incluí una tasación pericial del valor de los terrenos tal como prevé la Llei de Patrimonoi del Principáu d'Asturies. Ésti testu implica, que en virtú del valor, tendría que facese la enaxenación o la permuta al traviés d'una llei. Esti ye'l casu de terrenos que superen los 20 millones d'euros de tasación.