Menu

Respuenden asina a dos entrugues de Gaspar Llamazares nel Congresu y d'Emilia Vázquez na Xunta

El Ministeriu d'Agricultura y la Conseyería de Agroganadería y Recursos Autóctonos d'Asturies devuélvense la pelota na so responsabilidá sobre la estensión de la especie invasora conocida como la yerba de la pampa, o más coloquialmente, sobre los plumeros.

Asina s'esprende de les entrugues parlamentaries realizaes por Gaspar Llamazares nel Congresu de los diputaos y por Emilia Vázquez na Xunta Xeneral. Dambos preguntaben sobre la evolución de la cortaderia selloana y sobre les midíes que tomaron o piensen tomar pa logar la erradicación d'esta planta o, nel so casu, qué midíes de cooperación punxeron les alministraciones pa llograr esi oxetivu. Emilia Vázquez va esixir al Gobiernu asturianu qu'aparque les maniobres de dilación y exerza la defensa del mediu ambiente de la comunidá y adelantra qu'IX va llevar a cabu nel parlamentu distintes iniciatives.

Según el Ministeriu d'Agricultura, Alimentación y Medioambiente “la competencia na xestión d'especies pertenez a les comunidaes autónomes, por tanto, correspuénde-yos a elles llevar a cabu les actuaciones nel mediu natural que se necesita pal control de les especies exótiques invasores”. La especie cortaderia selloana foi incluyida como una de les 25 especies a controlar dientro del Plan de Control y Eliminación d'especies vexetales invasores de sistemes dunares, esplica'l Ministeriu, al empar qu'asegura qu'esti plan nun establez programación tresañal sinón qu'apurre unes conocencies xenériques pa la so xestión nestos hábitats.

Per parte del Principáu, respuende que los plumeros, especie invasora qu'abondó nos últimos años, ta directamente amestada coles infraestructures sobremanera, coles carreteres polo que se fixo más visible la so presencia. “Paez evidente que, cuidando que les infraestructures y el so caltenimientu correspuenden a distintes alministraciones públiques dependiendo de la so titularidá, les midíes qu'han de tomase, conforme a lo establecío nel Real Decreto 630/2013, pol que se regula'l Catálogu español d'especies exótiques invasores, correspuenden a les alministraciones competentes y polo tanto siquier, a les Direcciones Xenerales d'Infraestructures, Demarcación de Mariñes, Confederación Hidrográfica de l'Alministración Central y a ésta Dirección Xeneral de Recursos Naturales”, sostien la comunidá Autónoma, que, d'últimes apela a que se fai necesariu establecer mecanismos de collaboración pa encarar la eliminación d'esta especie”.

La Conseyería asturiana fai referencia a que plantegó esta collaboración nel Conseyu Estatal pa la Biodiversidá y el Patrimoniu Natural, nel que s'informó “de la intención” del Ministeriu de Mediu Ambiente d'ellaborar llueu una estratexa de erradicación.

Amás el Ministeriu alvierte que la erradicación total d'esta planta ye, na actualidá, un procesu difícil de consiguir. Los métodos conocíos, hasta agora, nun son totalmente eficaces. Amás, antes d'acometer cualquier acción de erradicación, ye precisu estudiar, en detalle, les particularidaes de cada llugar y tener en cuenta la diversidá de situaciones y los posibles impactos que puedan causar sobre otres especies non oxetivu, según sobre la erosión y otres afecciones.