El parllamentariu d'IX adelantra nel Plenu del Congresu qu'el so grupu “nun se va asitiar en contra” de la norma, pero considera que les midíes escurríes pol Executivu de Mariano Rajoy “nun son la solución, siquier pa los ciudadanos y ciudadanes que creemos nos servicios públicos”
El diputáu d'Izquierda Xunida Ricardo Sixto refartó güei al ministru de Facienda, Cristóbal Montoro, qu'el so decretu-llei de midíes de sostenibilidá financiera de les comunidaes autónomes y entidaes locales aldericáu güei nel Congresu, que ‘perdona’ los intereses polos creitu contraíos por éstes col Estáu al traviés del Fondu de Lliquidez Autonómica (FLA), ye “una clara reconocencia d'erros y una enmienda a la estratexa que llevó esti Gobiernu”, en referencia a la situación económica qu'abasnen les autonomíes y les corporaciones locales.
Sixto adelantró mientres la so intervención nel Plenu Estraordinariu celebráu esta tarde na Cámara Baxa qu'el so grupu “nun se va asitiar en contra” de la llei, pero considera que les midíes escurríes pol Executivu de Mariano Rajoy “nun son la solución, siquier pa los ciudadanos y ciudadanes que creemos nos servicios públicos”. Argumentó qu'esta reestructuración de los fondos d'ayuda financiera que llanza'l PP ye tamién “una forma de reestructuración de la delda xenerada por esos mesmos fondos nel pasáu”.
El parllamentariu d'IX por Valencia criticó a Montoro el tiempu y el dineru “qu'hubiéramos aforrao si'l Gobiernu traxera antes estes idees” y “cuántu s'aforraríen les corporaciones municipales y les autonomíes si fixeren casu antes a los comentarios que proponíen fórmules más razonables de financiamientu”.
El voceru d'IX, ICV-EUiA, CHA nesti alderique reconoció la validez de dellos aspeutos del decretu, pero aportunó na so crítica sobre que'l conxuntu de les midíes llega “tarde”, cuando la situación financiera de bona parte de comunidaes y conceyos “ye crítica”. “Tán afogaos y non yá pola coyuntura económica desfavorable, sinón tamién porque la llei de financiamientu ye claramente insuficiente pa caltener una estructura política como la d'España”, dixo.
“Sía que non –esplicó Sixto-, cualquier ayuda financiera per parte del Estáu y de los sos mecanismos va ser una ayuda a los ciudadanos y ciudadanes que somos usuarios de los servicios públicos fundamentales”. Argumentó que “esto ye bien importante, especialmente dende'l momentu nel que la saturación nos hospitales y la masificación de les escueles ye una realidá permanente en tol Estáu”.
Ricardo Sixto aseguró na so vez de palabra que “sospriende tamién que'l Gobiernu decidiérase por fin a utilizar de forma activa'l mecanismu de la intermediación financiera pública, anque sía al traviés del ICO”. Cuntó que “oxalá esti fechu dexe al Gobiernu entender que'l sistema financieru priváu nun ta en condiciones de garantizar un financiamientu que dexe atayar los problemes sociales d'esti país”.
Amás, tachó como “incomprensible” lo que denominó como “enorme prestu cola que'l Gobiernu fala de mecanismos como'l Plan de Provisores, cuando rescampla que trai l'encarecimientu del financiamientu pal Estáu y l'arriquecimientu inxustificáu de la banca privada”.
Al so xuiciu, l'Executivu del Partíu Popular “tendría d'entender, sía que non, que los estímulos económicos bien diseñaos son la principal ferramienta pa combatir los déficits públicos. Por eso tamién ye incomprensible qu'esti decretu caltenga una enorme condicionalidad regresiva pa toles instituciones que s'acueyan a los planes. A la fin esa condicionalidad traduzse namá en planes d'axuste que frayen los derechos social y democráticu, esto ye, la soberanía de les entidaes rescataes”.
El parllamentariu valencianu recordó'l recursu presentáu a instancies d'IX pola Defensora del Pueblu y almitíu a trámite pol Tribunal Constitucional contra'l decretu del Gobiernu nel que se frayaba la soberanía municipal con oxetu d'aplicar planes d'axuste ensin el so consentimientu”. Denunció que “estes nun son les formes”, porque “la democracia nun ta per debaxo de les necesidaes bancaries”.
“La nuesa economía, comunidaes y conceyos precisen una solución, pero ésta nun va llegar pela vía de los planes d'axuste”, esplicó, una y bones estos “impliquen retayos en servicios públicos, inclusive privatizaciones y, a última hora, una amenorga na calidá de vida de los ciudadanos”, sentenció.
Diputáu Autonómicu y Coordinador d'IX
Diputado Autonómico
(Mas Asturies)
Diputada Autonómica
Convocatoria por Asturies