Menu

Jesús Iglesias, Coordinador Xeneral d'IX d'Asturies y voceru del grupu parlamentariu IX-BA-Verdes, participó esta tarde, xunto a conceyales de la coalición de Mieres, Llaviana y Ayer, nuna reunión con representantes d'IX de Castilla y Llión, encabezaos polos coordinadores xenerales de Castilla y Llión, José María González, y de Llión, Miguel Ángel Fernández, p'abordar una estratexa de llucha conxunta ente les dos partes de la cordillera.

Jesús Iglesias reclama la presentación de la “Estratexa enerxética d'Asturies” enantes de poner como necesaria la llínia Sama- Velilla

Jesús Iglesias, Coordinador Xeneral d'IX d'Asturies y voceru del grupu parlamentariu IX-BA-Verdes, participó esta tarde, xunto a conceyales de la coalición de Mieres, Llaviana y Ayer, nuna reunión con representantes d'IX de Castilla y Llión, encabezaos polos coordinadores xenerales de Castilla y Llión, José María González, y de Llión, Miguel Ángel Fernández, p'abordar una estratexa de llucha conxunta ente les dos partes de la cordillera.

Asturies ta viviendo nos últimos tiempos un procesu de modernización d'un sector económicu que tuvo gran pesu na economía asturiana, el sector enerxéticu. Nestos momentos ta en fase d'ellaboración un documentu que'l gobiernu asturianu denominó “Estratexa Enerxética del Principáu d'Asturies 2007-2012” del que IX-BA-Verdes inda nun tien conocimientu oficial, tal como recordó Iglesias. Esti documentu contempla que nel escenariu de 2012 va duplicase la producción enerxética producía n'Asturies, pasando de 3.874 megawatios a 7.420 megawatios. Nestos momentos tan en marcha unes inversiones de 3.455 millones d'euros, que nun van ser relevantes pal aumentu d'emplegu. Según estes previsiones nel añu 2010, a pesar de la inversión, los trabayadores del sector namái van ser 451 más de los que hai nesti momentu, anque va compensase la destrucción d'emplegu de la minería, como taba previsto.

N'opinión d'Iglesias, cuando se afronta un plan como ye' l de la producción energxtica que va significar 9 centrales más, la regasificadora de El Musel, la puesta en marcha de ciclos combinaos de gas, parques eólicos nel Occidente, la cooxeneración.... con importantes consecuencies medioambientales y de difícil evaluación, ye imprescindible realizar un análisis que IX-BA-Verdes espera facer a partir de la documentación pública del documentu Estratexa Enerxética del Principáu d'Asturies. “Asturies nun pue cometer los errores que cometió nel pasáu. El desarrollu industrial nel últimu cuartu del sieglu XIX y nel XX tuvo basáu nuna industria pesada mui agresiva col mediuambiente cuyes consecuencies entá padecemos anguaño, dixo Iglesias. Iglesias reclamó conocer los términos d'esti documentu y la xustificación, si ye que ña hai, d'una llínia d'alta tensión como Lada-Velilla. “Ye mui importante que nesta revisión del modelu de desarrollu asturianu se sía capaz d'alcontrar fórmules y alternatives que garanticen que realidaes asemeyaes nun se van a producir”, como esplicó'l diputáu d'IX-BAVerdes.

“Deben facese un análisis sobre la necesidá real de buscar alternatives a les esistentes anguaño pa la evacuación de la enerxía, con un nuevu trazáu de rede de conesión d'alta tensión y a partir d'esi momentu escomenzar a falar del trazáu y non enantes”, aseguró Iglesias en presencia de José María González, Coordinador Xeneral d'IU de Castilla y Llión.

Tampoco tien que llevase al cabu esta actuación xenerando confrontación ente los municipios afeutaos. Iglesias recordó que'l trazáu anterior de la llínia cruzaba'l muncipiu de Casu y nesti casu fuí suficiente'l fechu de que atravesase una reserva natural de la biosfera pa que fuese desecháu, dempués d'haber invertío ya en torretes más de 10 millones d'euros. “Hai que tar mui seguros de la necesidá de la nueva rede y de que la opción que finalmente se ponga en marcha, si fuera necesaria, sía la que menos impactu medioambiental xenere y la que signifique una espresión de sensibilidá mediuambiental por parte de Rede Elléctrica en rellación coles alegaciones formulaes ya y nel futuru, ante los hipotéticos trazaos que se baraxen”, esplicó'l Coordinador Xeneral d'IX d'Asturies.

Pola so parte, el Coordinador Xeneral de Castilla y Llión, dempués d'agradecer el camín común de defensa a los dos llaos de la cordillera, recordó que esti problema nun ye nuevu, al igual que la implicación d'IX d'Asturies, Castilla y Llión y federal. González recordó que ye un proyectu vieyu, de más de 20 años, un proyectu innecesariu n'aquellos momentos e innecesariu ya inxustificáu agora. “Lo que tamos intentando nestos momentos ye'l renacer d'un vieyu proyectu que se demostró que yera innecesariu”, afirmó José María González. Nel sieglu XXI, nun se pue poner en peligru ni en riesgu'l desarrollu económicu de territorios d'Asturies y Castilla y Llión ensin tener encima de la mesa un proyectu adaptáu al sieglu XXI, ni pueden ser les mesmes soluciones que entonces. Sama-Velilla ye una llínia que supón un desastre ecolóxicu, según José María González.