Menu

La diputada d'IX apella al ministru Alfonso Alonso nel Congresu sobre les midíes que tien previstu tomar “pa erradicar l'aumentu de la discriminación contra les muyeres”, una y bones les impuestes hasta agora “nun fixeron más qu'afondar la fienda y la desigualdá”

La diputada d'Izquierda Xunida y vocera d'Igualdá del grupu d'IX, ICV-EUiA, CHA, Ascensión de les Heras, acusó güei al Gobiernu de Mariano Rajoy de “afitar y fortalecer la cultura machista y patriarcal” nel nuesu país que, precisamente, ye la que reclamen los sectores “más ultraconservadores” de la sociedá. De les Heras apelló al Executivu nel Plenu del Congresu al traviés del so ministru de Sanidá, Servicios Sociales ya Igualdá, Alfonso Alonso, alrodiu de les midíes que tien previstu tomar “pa erradicar l'aumentu de la discriminación contra les muyeres”.

La parllamentaria d'IX motivó la so intervención, ente otros argumentos, nes conclusiones d'una delegación del Grupu de Trabayu de Naciones Xuníes sobre igualdá de xéneru -que visitó España n'avientu pa valorar la situación de discriminación contra les muyeres-, y que “dexa n'evidencia la situación de grave retrocesu” tocantes a les propuestes polítiques y les meyores consiguíes nos últimos decenios en materia d'igualdá ente homes y muyeres.

Aseguró que “toos y cada unu de los estremos” que rellata de manera xeneraliza la declaración de la delegación de la ONU “tán siendo denunciaos dende empiezos d'esta crisis-estafa’ per parte de les organizaciones y asociaciones de muyeres, espertes n'igualdá de xéneru y por un ampliu espectru de la oposición nesta Cámara”. Al so xuiciu, a día de güei'l Gobiernu del PP “nun fixo otra cosa que nun sía tomar midíes de calter políticu y lexislativu tendentes a afondar  na fienda de discriminación contra les muyeres”.

A lo llargo de la so intervención parlamentaria De les Heras destacó dalgunos de los retayos económicos y de derechos impulsaos pol Executivu de Rajoy, “de marcáu sesgu ideolóxicu” y qu'afondaron na fienda de discriminación que sufren les muyeres. Referíase a la reforma llaboral, la reforma de l'alministración local, a la reforma educativa de la LOMCE, y a la desigualdá salarial ente homes y muyeres o a los retayos en gastu social que formen parte de les “polítiques austericidas” adoptaes en dependencia, Educación, Sanidá y pensiones. Too ello “conderga a les muyeres a volver a les sos cases pa realizar les xeres de cuidu de les que se desabre esti Gobiernu”, denunció.

Pa De les Heras, el ministeriu qu'agora dirixe Alfonso Alonso desabrióse de les sos obligaciones y de los compromisos lexislativos adquiríos en materia de “racionalización d'horarios, conciliación personal, familiar y llaboral, y la corresponsabilidá”.

Cuntó que toes estes midíes “suponen un grave retrocesu tocantes a la necesidá de erradicar d'ente los mozos los esmolecedores estereotipos sexistes que persisten na nuesa sociedá, y que s'amuesen de cara a un futuru inmediatu como una de les principales barreres p'avanzar escontra la igualdá real y efectivo”.

En relación a la violencia machista, De les Heras esplicó que ye'l máximu esponente de la desigualdá y discriminación contra la muyer”. Reprochó al Gobiernu nun demostrar “con fechos constatables” nenguna intención d'atayala.

Según la vocera d'Igualdá d'IX, les muyeres víctimes de violencia machista “siguen tando nuna grave situación de mieu ya indefensión pola falta de recursos sociales y económicos  a la d'encarar la separación o'l divorciu”. Esplicó que les campañes de prevención son “claramente insuficientes” si, de la mesma, “nun se dan les garantíes d'una tupia rede de servicios que garanticen la plena protección y atención a les víctimes per parte de los poderes públicos responsables”.

Ascensión de les Heras tamién criticó con durez la posición d'Alonso alrodiu de la llei que regula la interrupción voluntaria del embaranzu y el so interés en “torgar que les muyeres de 16 a 18 años puedan aportar a un albuertu llegal y seguro ensin el consentimientu parental”.

Primero que se confirmara que'l Grupu Popular rexistrara esta mesma mañana na Cámara Baxa una proposición de llei pa tratar d'executar estos cambeos, la diputada d'IX argumentó qu'esta reforma “nun ye necesaria” porque'l 87% de les moces que deciden atayar el so embaranzu fainlo col sofitu y l'acompañamientu familiar. Refartó a Alonso que dexen “desarimada” a una minoría d'adolescentes “bien vulnerables”, por cuenta de “una situación llende, con circunstancies familiares bien graves, en munchos casos víctimes de violencia y abusos sexuales, que se van ver empuestes a un albuertu clandestín y a poner en riesgu'l so salú y la so vida”.

De les Heras señaló tamién que la situación de desigualdá y discriminación contra les muyeres “ye acaldía más grave” y que precisa del compromisu políticu “p'articular de manera integral y urxente midíes de llucha contra la precarización y la probeza femenina, según contra la discriminación y la violencia de xéneru, que ta en peligrosu aumentu nel nuesu país”.