Menu

Aurelio Martín sorraya que nun va poner torgues a la tramitación de les lleis de Bon Gobiernu y Tresparencia pero alvirtió que “lo que mal empieza, mal acaba”

El grupu parlamentariu d'IX na Xunta Xeneral va llevar a la sesión del plenu del xueves una interpelación sobre la función social de la vivienda, que surde d'una iniciativa de la Plataforma d'Afectaos pola Hipoteca, coles mires de que'l Gobiernu dea cunta sobre les midíes que tomó sobre esti asuntu, qu'IX “xulga a les clares insuficientes”, como señaló'l voceru d'IX, Aurelio Martín.

El vienres, IX va defender una moción subsiguiente a interpelación sobre'l patrimoniu arqueolóxicu de Grandas  de Salime. Na mesma solicítase al Gobiernu que tome la iniciativa y ponga orde na xestión del castru del Chao Samartín y al Muséu, cuidando que ye quien tien la competencia.  “Un patrimoniu d'estes característiques nun puede depender del caprichu del alcalde de cada localidá”, alvirtió Martín.

A entrugues de los periodistes sobre'l cambéu del testu que'l Gobiernu unvió a la cámara de la Llei de Bon Gobiernu, el voceru d'IX esplicó que la posición d'IX nun va ser la d'apexar la tramitación, pero espera conocer la opinión de los lletraos el próximu miércoles, anque s'amosó críticu con una llei de la que dixo: “lo que mal empieza, mal acaba”. Martín reconoció “l'intentu” del Gobiernu d'iguar el testu, los esfuerzos enormes de los lletraos por da-y sentíu a la llei, amás de que yá non se paecen en nada a lo que'l Gobiernu unvió. De la mesma, recordó qu'estos dos lleis, -la de Bon Gobiernu y la de Tresparencia- como dixeron los espertos que comparecieron na ponencia, tendríen de tramitase como una sola yá que tienen vasos comunicantes en determinaos aspeutos y que estes lleis nun respondíen a les mires, la de superar les lleis asturianes y la estatal, porque en munchos casos yera “un curtia y pega”. “Tamos faciendo lo que buenamente puédese pero soi incapaz de dicir si na ponencia vamos poder superar toles torgues qu'hai”, dixo'l voceru d'IX.

Tamién como respuesta a por qué'l Gobiernu nun va aprobar la tercer reforma del sector públicu n'Asturies, Aurelio Martín sorrayó qu'IX ye escéptica cola reforma del sector públicu, porque tán nel orde ideolóxicu d'acabar con él.  “Les nueses demandes son nel sentíu d'afitamientu del sector públicu, non de malvender, reestructurar   y despidir trabayadores. Nun tamos neses reformes”, alvirtió'l voceru d'IX, sinón na d'apostar  por un sector públicu más potente, eficiente y  con garantíes pa el trabayadores y cola mesma participación nel PIB d'otros países europeos. “Llevase per delantre'l sector públicu ye una obsesión enfermiza ya ideolóxica, nun respuende a la realidá”, concluyó Martín.