Menu

El voceru d'IX nel Alderique sobre l'estáu de la Nación denuncia les polítiques suicides del Gobiernu del Partíu Popular porque amontaron la desigualdá, la precariedá y la probeza nel nuesu país

El diputáu y voceru d'Izquierda Xunida nel Alderique sobre l'estáu de la Nación, Alberto Garzón, detalló esta tarde mientres la so intervención el compromisu d'IX pa construyir un “nuevu país” y acusó al presidente del Gobiernu, Mariano Rajoy, de ser “l'alumnu aventayáu, el primeru de la clase” de la canciller alemana, Angela Merkel, lo mesmo que de dexar un país afaráu”. Amás, denunció les polítiques suicides” del Executivu del Partíu Popular por "amontar la desigualdá, la precariedá y la probeza" nel nuesu país.

Garzón criticó na so primer participación nun alderique d'estes característiques el discursu calteníu por Rajoy a lo llargo de la xornada, que tachó de “cuentacuentos” y de dibuxar “un país falambaldre que nun esiste más que na so mente”. Ironizó cola recuperación económica” y colos ésitos espuestos pol so interlocutor, que tradució namái como un ésitu pa les grandes fortunes y les grandes empreses a les que prácticamente yá nun-yos cabe más dineru nel bolsu”, y que “parasiten lo público y lo privao” a costa del restu de la población.

Refartó la "falta de rigor" del presidente del Executivu na so esposición y que fixera una “descarada apoloxía de les mesmes polítiques que tán emburriando a la miseria” a la sociedá. Ante ello, el candidatu d'IX a la Presidencia del Gobiernu contrapunxo'l “firme convencimientu” d'esta formación pa “construyir daqué distinto a eso, un nuevu país al serviciu de les necesidaes de la so xente” que “namái ye posible dende los valores y principios de la izquierda”.

Garzón reprochó a Rajoy que nun tríe la cai pa comprobar “la dramática realidá cotidiana na que desgraciadamente viven la mayoría de los españoles”. Responsabilizó tamién al so Gobiernu de los retayos que retayen la vida de los ciudadanos” y recordó la oposición del PP a delles de les iniciatives impulsaes por IX rellacionaes cola probeza enerxética o cola Llei antidesahucios’ promovida n'Andalucía y que foi paralizada col recursu presentáu ante'l Tribunal Constitucional.

Alberto Garzón esbilló a lo llargo de la so intervención dalgunes de les propuestes d'Izquierda Xunida que busquen resolver los principales problemes d'emerxencia social "qu'aquexen a los ciudadanos, ente elles la recuperación d'empreses estratéxiques que garanticen a la ciudadanía l'accesu a los suministros básicos y a los servicios públicos”.

“Nin una persona ensin accesu a la vivienda, nin una persona ensin comida, nin una persona ensin lluz o agua. Eso ye lo que va implicar el nuevu país que vamos construyir”, avisó.

Respectu al problema del emplegu, el diputáu d'IX per Málaga acusó a Rajoy de tar “desguazándolo” y de crear un marcu llaboral “cada vegada peor”, que pon a el trabayadores en condiciones de “semiesclavitud”. Nesti puntu, esplicó l'alternativa de crear un plan de trabayu garantizáu” xestionáu pola sociedá civil nos territorios, pero financiáu con dineru público. Alvirtió que ponelo en práctica “nun ye un problema técnicu, sinón de falta de voluntá política”.

El parllamentariu d'IX denunció que l'Executivu del PP ta “afarando les conquistes sociales que los nuesos padres consiguieron” y por tar “desguazando tamién la Educación, la Sanidá y les pensiones públiques”. Censuró al presidente del Gobiernu por tar “escalando'l país” y llomó la so xestión de “capitalismu de amiguetes”.

De la mesma forma, calificó como “autoritaries y represives” dalgunes de les midíes aprobaes apocayá pol Gobiernu, en referencia a la denominada ‘llei mordaza’ o la inclusión de la cadena perpetua na reforma del Códigu Penal.

Garzón tamién aludió a los numberosos casos de corrupción que chisquen al Partíu Popular, cuestión “de la qu'usté -dixo- ye'l máximu representante”. Esixó más recursos pa la Xusticia “pa caltenese independiente del poder oligárquicu, políticu y económicu”.

Alberto Garzón alvirtió a Mariano Rajoy de que “vamos recuperar tolos derechos qu'usté nos ta robando. Porque la llucha de los nuesos padres y madres, güelos y güeles nun va cayer en devanéu, y muncho menos ante un Gobiernu reaccionariu como'l suyu. Son tiempos convulsos, pero los únicos que tienen que tarrecer perder son los corruptos y los poderosos”. Concluyó con un contundente “¡vamos echalu! Salú y república”.