Menu

El voceru d'IX considera qu'entá hai tiempu pa realizar un xiru social. El cambéu constrúyese día ente día, alvierte

Gaspar Llamazares, voceru d'IX na Xunta Xeneral, dexó sobre la mesa la posibilidá acordies col grupu parlamentariu socialista y col de Podemos. A dambos reclamó-yos una “ufierta seria”, con dos oxetivos: un gobiernu con amplia mayoría parlamentaria, fuerte, un tripartitu o inclusive un bipartitu, que dexe abierta hasta'l final de la negociación quien sía'l presidente, tal como fixeron n'otres comunidaes autónomes onde dambos partíos llegaron a un alcuerdu. “¿Cuál ye'l fechu diferencial n'Asturies pa qu'equí nun sía posible”, preguntóse'l voceru d'IX a la fin d'una intervención na qu'analizó los discursos de los trés candidatos. De la mesma, argumentó qu'otres posiciones representen patrimonializar el cambéu per parte d'un partíu o patrimonializar un gobiernu per parte d'otru.

Llamazares realizó una dura y crítica intervención alvirtiendo qu'Asturies quier un cambéu mestizu y asina lo reflexaron les resultancies electorales, anque paez que los grupos parlamentarios nun escucharon el mensaxe de los asturianos. “Los asturianos demanden un xiru escontra lo social, quieren cambéu y tán fartos de corrupción y demanden rexeneración democrática”, esplicó. Frente a esti cambéu, al so xuiciu, la reacción de les fuerces de la cámara ye la de la “bandería en condiciones de mayor pluralidá”, con candidatos que nun tienen nin un terciu de la cámara, candidatos a los qu'IX votaría non, si esistiera esa posibilidá que la llei taraza. Consideró esta una oportunidá perdida y alvirtió que “los trenes nun pasen dos veces”, nin confía en qu'haya variaciones dempués de les xenerales y que piensa que'l cambéu constrúyese día ente día, nin al asaltu, nin de forma sele. Entá asina, esplicó que'l grupu d'IX nun pierde “la esperanza” porque esiste tiempu, anque sían hores pa realizar un cambéu escontra la izquierda.

Otra manera, los grupos hasta agora, dixo, “nun escuchamos, nun dialogamos, nun comprometemos” nuna especie de “España del esperpentu, aquella onde prima l'interés y el golpe d'efectu”. Anque dexó claro que non tolos grupos tienen el mesmu grau de responsabilidá y la responsabilidá ye la que demanden los ciudadanos, los trabayadores de colectivos en crisis y el restu. “Los trabayadores esperen nun añedir medrana a la so medrana”, dixo Llamazares al respective de la configuración d'un gobiernu sólidu. “El nuesu grupu ta murniu porque esta cámara nun ta al altor d'Asturies”, aseguró na tribuna d'oradores antes de señalar qu'esiste una base programática d'alcuerdu pero torgar actitúes escluyentes y acomodamientu a lo vieyo. De la mesma, sorrayó que va haber quien piense que l'avión solo pilótase con nuevos pilotos, pero munches vegaes, dixo “la revolución llabrase con vieyos gües”.

Nel analís de los discursos de los trés aspirantes, qu'analizó de lo más alloñao a lo más cercanu ideolóxicamente, asitió les responsabilidaes de cada grupu "nun camín a nenguna parte” qu'IX refuga.

Al respective de Emilio León, de Podemos, lo más cercano en términos de compañía nes lluches y les propuestes, el voceru d'IX alvirtió que la cercanía nun ye tanta nel programa a tenor de la so intervención, una y bones IX va más allá en dellos aspeutos, nel programa de rexeneración, nel de rescate social, -garantizando derechos- o en dellos aspeutos que nun se vieron reflexaos nel discursu, como la so opinión sobre'l texíu industrial, sobre la sanidá, la educación y servicios sociales. Entá asina, Llamazares esplicó que'l desalcuerdu fundamental nun ye'l programáticu, sinón si ye o non realizable en función del númberu de diputaos. La suma de los diputaos de dambes fuerces daría una minoría parlamentaria ensin sustentu, dixo'l d'IX, de la que demandó respetu pa IX como grupu parlamentariu autónomu y demandó-yos que nun falen de los líderes d'IX, como IX nun fala de los suyos. “Nun somos lo mesmo, nun tenemos el mesmu oxetivu, nós tenemos una finalidá, qu'esista un cambéu posible”, concluyó Llamazares al respective de Podemos.

A Javier Fernández  reclamó-y la so obligación de diálogu, pactu y compromisu, cuestiones que nun realizó y llegó a la sesión como Mercedes Fernández. “Acordies colos sos votos tendría de liderar esi pactu y tendría d'esquizar esa vía buscando una mayoría. Nun fixo l'esfuerzu necesariu, nun sé si por resignación o por cálculu”, alvirtió de la que dixo nun saber qué-y esmolez más. Na valoración de la última llexislatura, Llamazares vio autocomplacencia y reproche per parte del Presidente en funciones y namá delles novedaes nes sos propuestes que definió como “un platu recalentado con dalgún ingrediente nuevu” y dalguna cuestión del programa d'IX. Tamién-y reprochó que nes polítiques sociales, el gobiernu asturianu nun consiguió desaniciar el embate de los retayos n'educación nin en sanidá; según destacó los compromisos incumplíos” en materia de rexeneración democrática como la llei electoral, la reforma de la llei del presidente, la de tresparencia y bon gobiernu, la reforma del estatutu… N'asuntos como la economía y l'emplegu resaltó qu'Asturies perdió valor añedíu brutu nel so sector industrial, en materia agrario la renta sigue a la baxa y nel sector turísticu y en medioambiente “Asturies vive de rentes”.

Al respective de la candidata del PP, Mercedes Fernández, Llamazares punxo de relieve la solombra allargada del gobiernu de Mariano Rajoy que la candidata despintó nel so discursu, una política que s'ensañare colos principales sectores d'Asturies y que la so política d'austeridá tuvo graves consecuencies. Ente los exemplos asitió la lliquidación de la minería, el riesgu nel que punxo al corazón industrial d'Asturies cola tarifa eléctrica, el bloquéu de les infraestructures…, amás d'unes polítiques de rebaxes fiscal nes que nun espliquen onde piensen retayar o les de sanidá y educación que al voceru d'IX recuérden-y les de la comunidá de Madrid.