Menu

La diputada Marta Pulgar pregunta al Gobiernu de Javier Fernández, qué piensa faer pa evitar que'l PP dexe ensin efectu real esta norma

Izquierda Xunida va pidir al Gobiernu del Principáu qu'asuma la so responsabilidá nel cumplimientu de la Llei de Memoria Histórica, más ante la posición del Gobiernu Central que ta balerando de conteníos y recursos económicos les exes d'actuación que se prevía nesa norma.

La diputada d'IX, Marta Pulgar, presentó a la mesa de la Xunta Xeneral del Principáu, trés preguntes precisamente por que el executivu de Javier Fernández esclarie si tien previstu implementar les midíes necesaries pa evitar que la Llei de Memoria Histórica pase al olvidu.

“El nuesu oxetivu ye que se cumpla llei. Asturies foi una comunidá especialmente cutida, tantu mientres la guerra bélica como, depués, pola represión del réxime fascista de Franco. Nun podemos permanecer impasibles viendo como'l PP vacía de conteníu y recursos la Llei de Memoria Histórica y nun podríamos entender, tampoco, que'l Gobiernu del Principáu conformárase aceptando l'olvidu. Creemos qu'Asturies tien que llantar cara y esixir al Gobiernu d'España que cumpla cola memoria y la dignidá de les víctimes”.

Pulgar reclama al Gobiernu qu'esplique si tien previstu realizar o impulsar l'actualización del mapa de fueses comunes, anovando la collaboración pa esti fin cola Universidá d'Uviéu y les asociaciones pa la recuperación de la memoria histórica, según qué midíes concretes y el so compromisu presupuestariu pa llevar a efectu'l conteníu de la llei 52/2007 (de Memoria Histórica) pola que se reconocen y amplíen derechos y establécense midíes a favor de quien carecieron persecución o violencia mientres la guerra civil y la dictadura o, nel so casu, qué reclamaciones va formular ante'l Gobiernu del Estáu pa garantizar el so cumplimientu.

Na tercer entruga, IX demanda al Principáu qu'esplique si ta previstu crear, nel Ámbitu de la comunidá Autónoma una Oficina de Víctimes de la Guerra Civil y la Dictadura, pa salvaguardar l'afayadiza tutela de los derechos de les persones y asociaciones interesaes o, siquier, si va solicitar al Gobiernu Central que se recupere esa oficina nos términos que nel so día se plantegaron nel Congresu de los Diputaos col sofitu del grupu Socialista.