Menu

La coalición espera qu'esta comisión sirva pa llograr un ampliu consensu sobre la nomalización, impulsu y aceptación social

IX propunxo la creación d'una comisión non permanente y non lexislativa pa la promoción, protección, y normalización de la llingua asturiana na Xunta Xeneral del Principáu, que cuntó col sofitu de los grupos parlamentarios del PSOE, de Podemos y Foro Asturies, y el votu en contra del PP y Ciudadanos.

IX considera qu'esta ye una comisión complementaria a la d'Educación, cuidando que la cooficialidá paez que nun va tar nel programa de la llexislatura siquier de primeres, como ye'l deséu d'IX, trabayando en toles facetes y maneres posibles sobre la promoción y protección de la llingua asturiana, como declaró Concha Masa, vocera alxunta d'IX na Xunta Xeneral.  L'oxetivu d'IX ye qu'esta comisión pueda rematar los sos trabayos y conclusiones, ye dicir ufiertar distintes alternatives sobre'l réxime de protección y promoción del asturianu, nun plazu de seis meses dende la so constitución.

El testu de la iniciativa reconoz que'l réxime de protección del asturianu non sólo ye discriminatoriu ya inxustu, sinón totalmente insuficiente ya ineficaz pa caltener les sos posibilidaes comunicatives y de pervivencia social. Entiende'l grupu d'IX que dempués de más de 30 años d'autonomía, llegó'l momentu de que Asturies tenga un futuru cultural como sociedá articulada, non escluyente y con futuru, asumiendo programáticamente la necesidá d'un gran consensu políticu y social sobre les midíes necesaries pa la normalización sociolinguistica de la llingua, el so nivel de protección, el  so impulsu y la so definitiva aceptación social. Esi consensu debe modularse dende la más amplia participación social y ciudadana y esi ye l'oxetivu d'esta comisión non lexislativa.


Nel orde del día d'esta primer xunta tres del periodu veraniegu, los voceros trataron la propuesta del presidente sobre amenorgamientu de tiempos d'intervención nos alderiques plenarios coles mires de dar axilidá a los mesmos, dada la pluralidá de la cámara.

La propuesta aprobada supon:

Nes interpelaciones: 7 minutos pa la esposición de la interpelación; 7 minutos pa la contestación pol Conseyu de Gobiernu; 3 minutos pal retruque del interpelante; 3 minutos pa la contestación pol Conseyu de Gobiernu al retruque; 2 minutos de fixación de posición pa cada grupu parlamentariu non interpelante. En total, 30 minutos por interpelación.
  
Entrugues. 4 minutos pal autor de la entruga (descontada la curtia formulación) y 4 minutos pal Conseyu de Gobiernu. En total, 8 minutos per cada entruga.


La suma de interpelaciones y entrugues, que son les que s'enceten na sesión de los xueves, signifiquen una duración averada de 5 hores nesta sesión.

Iniciatives lexislatives: 10 minutos pa la presentación, yá sía pol Conseyu de Gobiernu, sía polos grupos parlamentarios y 8 minutos pa cada grupu parlamentariu. En total, 58 minutos per cada proyectu de llei y 50 minutos per cada proposición non de llei.

Mociones y Proposiciones Non de llei: 7 minutos pa la presentación y 5 minutos pa la fixación de posición per cada Grupu parlamentariu restante. En total, 32 minutos per cada moción o proposición non de llei.

El réxime de cupos nel orde del día de los plenos ye'l siguiente:

Mañana de los xueves: una interpelación per cada grupu parlamentariu y una entruga per cada grupu semanalmente; los grupos de más de cinco diputaos, tienen una interpelación más y una entruga más en cada plenu; una interpelación puede reemplazase por trés preguntes.

Mañana de los vienres: el grupu parlamentariu socialista tien tres iniciatives; el del PP, dos; el de Podemos, dos; el d'IX, una, el grupu parlamentariu de Foro Asturies y el Ciudadanos, una cada unu.