Menu

El diputáu y voceru parlamentariu d'Izquierda Xunida nel Congresu, José Luis Centella, reclamó güei al Gobiernu que “cumpla” y asuma l'acoyida de los cerca de 15.000 refuxaos que güei confirmó la Comisión Europea que-y correspuenden a España del total de los alredor de 120.000 llegaos a Grecia, Italia y Hungría.

Esta cifra triplica lo solicitao nun principiu el pasáu mes de mayu al nuesu país pola Unión Europea. Sicasí, Centella dexó claro qu'esta cifra namái supón “un parche” de lo que supón la mayor traxedia humanitaria dende la Segunda Guerra Mundial y avisó de que nun hai qu'escaecer a los millones de persones que siguen sufriendo los conflictos armaos qu'afaren los sos países.

En declaraciones nos pasiellos del Congresu, Centella esixó al Executivu de Mariano Rajoy qu'asuma la so responsabilidá con responsabilidá y que lo faiga dexando de “amoriar la perdiz” y poniendo fin a les sos repitíes “contradicciones” nes qu'asocedieron nos últimos díes varios de los miembros del gabinete popular’.

El parllamentariu d'IX aportunó en que l'acoyida d'estos cerca de 15.000 refuxaos nun ye la solución al problema. “Que naide piense qu'una vegada que s'acueya esta cuota de refuxaos yá s'acabó'l problema de los millones de persones que la tán sufriendo n'orixe”, comentó.

Fixo tamién un llamamientu públicu y analizó qu'anque'l focu mediáticu va pasar” en relación a esta tema los problemes van persistir y tener qu'asumir el conxuntu de la sociedá”. Dirixó tamién esti mensaxe al Gobiernu, a que los sos responsables recordó qu'amás de cumplir colo qu'agora riquen les instituciones de la Unión Europea “nun escaezan al restu” de persones que demanden ayuda.

Sobre'l costu que va suponer esta acoyida de los refuxaos, José Luis Centella señaló que “un Gobiernu que rescató a los bancos” y gastóse miles de millones de dineru público nello nun puede agora “ser cicateru” cuando de lo que se fala ye de vides y de cumplimientu de los derechos humanos. “Lo importante ye'l ser humanu y depués va haber que faer númberos”, dixo.