El grupu parlamentariu d'IX va apelar a la conseyera d'Infraestructures y Medioambiente na sesión del plenu d'esti xueves sobre la contaminación medioambiental en Xixón.
El grupu d'IX, que yá amosó'l so refugu en repitíes ocasiones a los aumentos de los índices de contaminación y a la reiteración de nubes de carbón que se producieron mientres esti branu, va esixir a la conseyera midíes preventives de la contaminación na mayor ciudá d'Asturies.
Al pie de esta interpelación, na sesión del vienres, los grupos tendrán d'asitiase sobre la Proposición Non de Llei na que la coalición encamienta al executivu de Mariano Rajoy a la urxente y prioritaria culminación y puesta en marcha de la Variante Ferroviaria de Payares primero que remate l'añu 2015. Tamién repite la importancia estratéxica p'Asturies de la Variante Ferroviaria, un ferrocarril del sieglu XXI pa una Asturies del sieglu XXI.
Per otru llau, Concha Masa, vocera axunta d'IX manifestó l'abusu que supon pa los grupos más pequenos la inclusión nel plenu d'esta selmana de 15 puntos per parte del PP y otros tantos per parte de Foru, ente qu'a IX correspuénde-y una interpelación y una proposición non de llei, saltándose los alcuerdos llograos al entamu de la llexislatura na Xunta de Voceres. La inclusión de 32 puntos nesti plenu ye una solución entemedia adoptada polos otros grupos pa incluyir los asuntos que PP y Foru ciscaben nun plenu estraordinariu. IX entiendi, sicasí, qu'en periodu ordinariu de celebración de plenos, los estraordinarios deben de ser por una cuestión bien escepcional y de gran perturbación del orde públicu y social, o siquier asina fueron les convocatories precedentes.
Diputáu Autonómicu y Coordinador d'IX
Diputado Autonómico
(Mas Asturies)
Diputada Autonómica
Convocatoria por Asturies