Menu

La coalición va preguntar sobre los planes d'emplegu, el ciclu de 0 a 3 años, la xestión de les árees sanitaries y los desahucios

El grupu parlamentariu d'IX va llevar al plenu d'esta selmana na Xunta Xeneral una Proposición Non de Llei sobre dignificación del asturianu, nes instituciones, medios de comunicación y toponimia porque, a xuiciu de Gaspar Llamazares, voceru parlamentariu na Xunta, inda hai un  desenvolvimientu que faer cola actual llei del asturianu, la Llei d'Usu y Promoción. La Proposición Non de Llei inclúi una batería de puntos nos que demanda rematar la negociación col MEC pa reconocer la especialidá docente de la llingua y el gallego-asturianu en Primaria y Secundaria, impulsar la creación del Grau en llingua asturiana na Universidá d'Uviéu, garantizar la ufierta de la enseñanza nos centros alcordaos, la emisión n'asturianu d'un 30% de la programación de la TPA, o la progresiva implantación del asturianu nel BOPA, ente otres cuestiones. Coles mesmes que mañana, y tamién a instancies d'IX, pondrase  en marcha la comisión parlamentaria pa estudiar la situación actual de la llingua asturiana y les posibles reformes que dexen el caltenimientu y el futuru de la llingua. La comisión va tar formada por dos miembros de cada grupu parlamentario y presidío pola diputada d'IX Concha Masa.

Na sesión de control del gobiernu, el xueves, IX van facese cuatro entrugues al gobiernu sobre diverses temes d'actualidá que van dende los planes d'emplegu, al concursu abiertu pa xestionar les árees sanitaries, la situación del ciclu de 0 a 3 años y la reforma de les lleis que faciliten la incorporación y permanencia nel parque públicu de viviendes de les persones que sufrieron un desahuciu.

IX va preguntar al gobiernu sobre'l caltenimientu y la reorientación  de los planes d'emplegu, yá que a xuiciu de la coalición, si nun se produz esa reordenación va haber problemes nos conceyos, que los obliguen en determinaes materies a la contratación, o con baxos salarios, “qu'IX tampoco quier”.

Tamién pregunta la coalición sobre los concursos nel ámbitu de les xerencies de les árees sanitaries. Nesti sentíu, Llamazares considera que'l  gobiernu tien enforma qu'esplicar. “IX creía que cola aplicación de la llei de la función  pública, esos concursos diben ser con méritos y capacidá, pero, sicasí, agora apaez  una coletilla, que nun compartimos n'absolutu, que dexa fichaxes o contrataciones esternes”, alvirtió'l voceru d'IX. Pa xestionar lo público tienen que ser xestores públicos, esplicó Llamazares.

De terceres, IX pregunta sobre les midíes que piensa tomar el gobiernu sobre la educación de 0 a 3 años.  Llamazares reconoció que ye cierto que se solucionó temporalmente'l  problema de caltener la plantiya pero, al mediu plazu, el gobiernu tien que clarificar de quién va depender el 0 a 3 años. A lo último, IX pregunta al Conseyu de Gobiernu si piensa introducir reformes normatives qu'entaínen y faciliten tantu la incorporación como la permanencia nel parque públicu de viviendes de les persones que sufrieron un desahuciu.