Menu

El Coordinador Xeneral d'IU d'Asturies, Jesús Iglesias, ufrió la so valoración sobre'l procesu aniciáu pol Gobiernu del Principáu y los axentes sociales p'algamar una nueva concertación social y la firma de los alcuerdos d'inversión de los fondos mineros. IU d'Asturies valora de forma mui positiva la concertación social, nuna llexislatura na que la coalición nun ta nel Gobiernu. Iglesias manifestó la so disposición, si asína lo consideren oportuno los axentes sociales, a mantener alcuentros pa compartir con IU conteníoa de la concertación y tamién p'avanzar lo que, al so xuiciu, tendríen que ser conteníos “ineludibles” para da-y rempuesta a la realidá d'Asturies.

Iglesias espón los conteníos “ineludibles” del futuru alcuerdu de concertación social pa da-y rempuesta a la realidá d'Asturies

El Coordinador Xeneral d'IU d'Asturies, Jesús Iglesias, ufrió la so valoración sobre'l procesu aniciáu pol Gobiernu del Principáu y los axentes sociales p'algamar una nueva concertación social y la firma de los alcuerdos d'inversión de los fondos mineros. IU d'Asturies valora de forma mui positiva la concertación social, nuna llexislatura na que la coalición nun ta nel Gobiernu. Iglesias manifestó la so disposición, si asína lo consideren oportuno los axentes sociales, a mantener alcuentros pa compartir con IU conteníoa de la concertación y tamién p'avanzar lo que, al so xuiciu, tendríen que ser conteníos “ineludibles” para da-y rempuesta a la realidá d'Asturies.

L'avance de la propuesta inicial fecha por Areces “nun cubre les espectatives d'IU”, aseguró'l Coordinador Xeneral. Nel capítulu d'I+D+I, nun basta con compromisos xenéricos d'impulsar la investigación, el desenrrollu y la innovación, sino que ye “imprescindible” que'l Gobiernu, xunto colos axentes sociales, fixen escenarios d'inversión pa la prósima llexislatura, que debieren averase al 2% del PIB. “Hasta agora nun fue posible porque los compromisos del Gobiernu autonómicu quedaron por debaxo y porque los empresarios quedaron por debaxo de la inversión oficial”, esplicó Iglesias.

La concertación social debe significar el reconocimientu del papel estratéxicu del sector industrial y la consolidación del Foru pola Industria, amás de la garantía de la continuidá d'esti últimu, pa que sía una ferramienta útil tanto como observatoriu de la realidá llaboral asturiana como focu d'emisión de propuestes hacia'l Gobiernu y la Xunta Xeneral del Principáu, y algamar asina que la política industrial sía lo más eficaz posible.

Ye necesario, en rellación col suelu industrial, poner en marcha delles idegues que se vinieron baraxando, ente elles, buscar fórmules pa la igua de polígonos industriales especializaos en determinaos sectores, lo que va facilitar la interrelación ente empreses. Del mesmu mou, na concertación, debería incluise, de la mano de los ayuntamientos, la dotación de servicios complementarios pa estes árees industriales. IU d'Asturies comparte colos axentes sociales la necesidá d'una mayor participación nos muérganos de xestión de las distintes sociedaes que dependen del Idepa (Institutu de Desenrrollu Económicu del Principáu d'Asturies).

El nuevu procesu de concertación debe incluir la puesta en marcha de mecanismos que finen cola precariedá llaboral na propia alministración autonómica, l'incrementu de los mecanismos d'inspección sobre les empreses y l'avance pa finar cola siniestralidá llaboral.

La cohesión social, a xuiciu de Jesús Iglesias, tien que ocupar un ampliu capítulu nesti futuru alcuerdu. Debe habilitar mecanismos públicos que garanticen servicios públicos de calidá, abrir nueves llínies de sofitu a la vivienda -por exemplu a la ayuda a la amortización del pagu de les hipoteques, tal como proponía IU-BA-Verdes- , la xuba del importe del salariu social, averándose al importe del 75% del Salariu Mínimu Interprofesional.

Fondos Mineros

El Coordinador Xeneral d'IU d'Asturies mostró la so satisfacción pola puesta en marcha del polígonu de Villallana, en Llena, dempués de munchos años de retrasu. “Por fín, parez que va a ser posible qu'arranque esta asignatura pendiente de los sucesivos Gobiernos d'Asturies”, dixo Iglesias. El Coordinador recordó que n'Asturies hubo durante munchos años la idega de “sentase a esperar pola empresona que traiga d'una tacada 4.000 ó 5.000 emplegos lo que sirvió como llastre pa la puesta en marcha d'esti polígonu”. Esa gran inversión fue un mitu.

El tren-tran, pa IU d'Asturies, debe ser analizáu y previstu nun plan de meyores del ferrocarril na rexón. Aisladamente consideráu va tener más dificultaes de ponese en marcha y al marxen de les demandes actuales y futures del tresporte de viaxeros. “Creemos qu'esi plan de tresporte ferroviariu tien que ser un elementu de vertebración territorial del conxuntu d'Asturies, porque por desgracia, como ocurre tantes veces , fíxense los güeyos nunas partes d'Asturies ensin buscar una visión de conxuntu”. El plan de meyores del ferrocarril n'Asturies tien que considerar les necesidaes nas Cuenques Mineres, pero tamién, les de la costa asturiana. La conesión de Feve ye insuficiente n'Oriente y n'Occidente, aseguró Jesús Iglesias.

Tampoco, como esplicó el Coordinador d'IU d'Asturies, pue falase de manera aislada del tren-tran, cuando, a la vez, ta falándose de les tresferencies ferroviaries, ya qu'indica una visión parcial. Iglesias recordó'l compromisu alquiríu de que la xestión del tren-tran va ser pública y va corresponde-y a FEVE. “Oxalá'l procesu de tresferencia de los ferrocarriles a les comunidaes autónomes nun sía'l pistoletazu de salida pa la so privatización, que tien que siguir siendo un elementu de tresporte colectivu y, fundamentalmente, públicu”.

Jesús Iglesias recordó que'l procesu de privatización de los servicios de cercaníes n'Inglaterra, col Gobiernu de Márgaret Thatcher, supuso una caida nes inversiones y la "baxada'n picáu” de la calidá del serviciu.