Menu

Orviz esixe'l caltenimientu de los compromisos inversores n'Arcelor Mittal y plantega una ofensiva lexislativa pa derogar les reformes llaborales

Izquierda Xunida-Unidá Popular va afitar como prioridaes nel so programa la defensa del texíu granible asturianu, con especial atención al sector primariu y al industrial, al entender que son la base” de la economía de la comunidá autónoma.

El coordinador d'IX Asturies y candidatu de la coalición, Manuel González Orviz, reivindicó güei que se caltengan los compromisos inversores en Areclor Mittal nes factoríes asturianes que la so importancia ye tal qu'acopa, dixo, namái con Arcelor Mittal “el 11-12 % del PIB. Les actividaes d'aceru y metal, pa esta comunidá, son como l'agua, dan vida”.

El candidatu d'IX-UP axuntóse güei col secretariu xeneral de MCA-UXT, Eduardo Donaire, y el secretariu xeneral de CC OO d'Industria d'Asturies, Damián Manzano, sy con miembros del comité d'Arcelor Mittal pa encetar una posición que dexe defender en tolos ámbitos la viabilidá, la sostenibilidá y la continuidá de la compañía. Pa ello, amás de les inversiones de renovación tecnolóxica, ye imprescindible, a xuiciu de Manuel González Orviz, una política empobinada a la innovación, onde, reconoció, yá hai un trabayu importante.

La xunta coles centrales y los representantes del comité respondía, amás, esplicó González Orviz, a un allugamientu ideolóxicu” de claru de respaldu de les organizaciones sindicales de clase. Y ye que, a pesar de los problemes, la empresa siderúrxica caltien una situación calidable nel emplegu bien cimeru al d'otres, dientro y fora d'Asturies, daqué que, esplicó'l candidatu d'Unidá Popular, tien que ver cola acción de los trabayadores y tamién de los sindicatos que, añedió, “son el dique de contención de les agresiones, xuntu coles organizaciones d'izquierda y la sociedá”.

Al respective de la estratexa empresarial, Manuel González Orviz, reclamó respuestes pa enfrentar les amenaces reales, pero tamién les que nun tienen base.  Faló asina de la entrada d'aceru chinu, como un peligru oxetivu, pero tamién de les amenaces de deslocalizaciones periódiques, que la so fin ye, en realidá, caltener paralizaes a les plantiyes, la sociedá y les mesmes instituciones. Frente a ello, el candidatu d'IX-UP anunció la determinación de llantar cara a la situación, con una ofensiva llexislativa. “Esta relación asimétrica modificase coles lleis, derogando lleis. Tamos falando de derogar la reforma llaboral colo que los sindicatos tendríen muncha mayor información, y l'alministración tendría muncha mayor información, pola senciellu razón de que tendríen que cuntar cola aprobación de l'autoridá llaboral”.

Pal secretariu de CC OO, Damián Manzano, la defensa de la industria y del emplegu pasa tamién por un claru allugamientu políticu: “ye difícil votar al incendiariu y depués apelar a la intervención de los bomberos”, símil que, al so xuiciu, quedó dafechu demostrao nos últimos años. Al respective d'Arcelor Mittal, señaló que les inversiones comprometíes, caltiénense, siquier hasta la fecha, daqué que, dixo, ye imprescindible pa garantizar el so futuru.

Pal máximu responsable de MCA-UXT, Eudardo Donaire, la defensa del sector ye irrenunciable, dada la so importancia pa la comunidá autónoma. “Pal señor Mittal la siderurxa asturiana ye la xoya de la so corona. Pa los asturianos, Arcelor Mittal tien de ser la corona, la corona que tenemos  que curiar toos”.

Esa defensa pasa por inversiones daqué que, esplicó Serendén, ta consiguiéndose y que tien una capital importancia, al tratase del motor de la nuesa rexón”.

Al respective de les alvertencies de la patronal europea, qu'agoren que l'aceru europeo va ver el so futuru comprometíu a partir de 2017, tanto Donarie como Manzano amosáronse confiaos en que tales previsiones fracasen.  Pal líder d'UXT, esa previsión surde de los analises de los economistes que, ironizó, suelen equivocar colo que va pasar y atinen cuando espliquen lo que yá asocedió.

D'igual forma manifestóse Manzano, que llamó l'atención sobre'l caltenimientu de les inversiones previstes, lo que vendría a contravenir tales badagüeyos.