Menu

El grupu parlamentariu d’IU-BA-Verdes propón la modificación de la Llei del Principáu d’Asturies de medios de comunicación social pa que’l direutor del Ente Públicu de Comunicación d’Asturies sía escoyíu pol Plenu de la Xunta Xeneral del Principáu d’Asturies por mayoría absoluta de los sos miembros y el mandatu sía de cinco años. Francisco Javier García Valledor, diputáu d'IU-BA-Verdes, presentó esta Proposición de Llei nuna rueda de prensa na Xunta Xeneral, na qu’abondó nos motivos d’esta reforma.

El grupu parlamentariu d’IU-BA-Verdes propón la modificación de la Llei del Principáu d’Asturies de medios de comunicación social pa que’l direutor del Ente Públicu de Comunicación d’Asturies sía escoyíu pol Plenu de la Xunta Xeneral del Principáu d’Asturies por mayoría absoluta de los sos miembros y el mandatu sía de cinco años. Francisco Javier García Valledor, diputáu d'IU-BA-Verdes, presentó esta Proposición de Llei nuna rueda de prensa na Xunta Xeneral, na qu’abondó nos motivos d’esta reforma.

Francisco Javier García Valledor recordó que la llei estatal que regula’l funcionamientu de la Corporación de Radio y Televisión Española camudose mesmamente pa que’l so direutor lu nome’l parlamentu y son munches les voces que, dende Asturies, pidieron dende la igua del ente, que’l direutor lu escueya’l Parlamentu y non a propuesta del Gobiernu d’Asturies. “Dende’l momentu de la so puesta en marcha hubo basura de voces que señalaben la excesiva dependencia de la radio y televisión públiques del executivu asturianu”, aseguró García Valledor demientres la so comparecencia ante los medios de comunicación.

La Proposición de Llei de Modificación de la Llei del Principáu d’Asturies 2/2003 de 17 de marzu de medios de comunicación social pon nel so artículu 10 que’l “Direutor Xeneral escuéyese nel Plenu de la Xunta Xeneral del Principáu por mayoría absoluta de los sos miembros”, “la condición de Direutor Xeneral ye incompatible col desendolcu de cualquier cargu públicu o priváu y va tar suxetu al réxime d’incompatibilidaes fixáu pa los miembros del Conseyu d’Alministración”, “la duración del mandatu del Direutor Xeneral va ser de cinco años. No obstante va siguir nel so cargu hasta la toma de posesión del nuevu Direutor Xeneral”, “el Direutor Xeneral va ser el muérganu executivu del Ente Públicu de Comunicación del Principáu d’Asturies, y va asistir con voz y votu a les comisiones del so Conseyu d’Alministración, cola sola esceición de les cuestiones que-y afeuten personalmente”. Esta modificación tamién inclui dos disposiciones transitories poles que’l pleno de la Xunta Xeneral pue proceder a la eleición del Direutor Xeneral del ente Públicu de Comunicación al traviés del procedimientu establecíu na presente llei nun plazu nun superior a trenta díes dende la so entrada en vigor, y el Direutor Xeneral del Ente nomáu pol Conseyu de Gobiernu cesante, va permanecer en funciones hasta la eleición del nuevu Direutor Xeneral.

Francisco Javier García Valledor considera que l’aprobación d’esta llei por unanimidá nel Parlamentu asturiano nun debería presentar mayores dificultaes ya que tanto’l Partíu Popular como’l Partíu Socialista dieron ya’l so sofitu a esti planteamientu nel Parlamentu español. “Entiendo que n’Asturies van mantener la mesma posición que nel parlamentu español”, esplicó García Valledor.

IU-BA-Verdes apuesta por un modelu de comunicación pública d'alleganza, de calidá, innovador, non sometíu a los índices d’audiencia y claramente comprometíu cola realidá política, económica, social, cultural y llingüística d’Asturies, tal como recordó Francisco Javier García Valledor.