Menu

La eurodiputada d'Izquierda Xunida Paloma López sollertó esti xueves de la “grave esguilada de represión” que se vive nos Territorios Ocupaos del Sáhara Occidental y esixó a la UE que nun se quede “de brazos cruzaos” ante “les constantes violaciones de los derechos humanos” que comete'l Reinu de Marruecos.

López, que ye vicepresidenta del grupu de sofitu al Sáhara Occidental na Eurocámara, dirixió esta selmana trés preguntes parllamentaries a l'Alta Representante de la UE p'Asuntos Esteriores y Política de Seguridá, Federica Mogherini, nes que denuncia detenciones y condenes arbitraries, según la represión policial de manifestantes.

“Ta produciéndose una grave esguilada de represión frente a la que tenemos d'actuar. Sicasí, la UE mira pa otru llau, ampara les espulsiones d'observadores internacionales y la negativa a una misión oficial d'esti Parlamentu”, denunció López, quien criticó que Mogherini nun tea exerciendo'l papel de garante de los Trataos qu'esixe'l so puestu, yá que “tolos alcuerdos comerciales de la UE con Marruecos tán venceyaos al respetu de los derechos humanos”.

Nuna de les sos entrugues, la eurodiputada referíase al casu de Mohamed Banbari, periodista saharagüi deteníu n'agostu de 2015 cuando se presentó nuna comisaría p'anovar  el so carné d'identidá. López espón nel so escritu que Banbari foi “torturáu” y “encarceláu n'evidente represalia pol so llabor d'observación y denuncia de la situación del pueblu saharagüi”. El periodista foi condergáu a seis año de prisión, a lo que se-y añediría una condena anterior a 12 años de cárcel.

López tamién llevó ante Mogherini la represión policial que sufren los activistes saharagüis mientres les manifestaciones, denunciando la brutal intervención de la Policía'l pasáu 20 de xineru en Bojador mientres la celebración d'una marcha pacífica en favor del derechu d'autodeterminación. Dos díes depués, nel Aaiún, repitíase'l mesmu episodiu pero esta vegada contra manifestantes en sofitu a la fuelga de fame de 19 mozos saharagüis paraos. En dambes manifestaciones produciéronse numberosos mancaos y hubo detenciones arbitraries.

A lo último, na tercera de les sos entrugues, López solicita información a la UE sobre la situación de Salah Lesbir, deteníu en xunu de 2015 y condergáu supuestamente por “publicar nes redes sociales”.

Mogherini yá asegurara nuna anterior comunicación con López que taba al tantu de la so condena y preguntara a delles organizaciones y al Reinu de Marruecos por él, pero nun desveló'l conteníu d'eses conversaciones. Nesta ocasión, la vicepresidenta del grupu de sofitu al Sáhara Occidental alvierte a l'Alta Representante que volvió ser condergáu a cuatro año más de cárcel y solicita que-y detalle les midíes que “va disponer p'asegurar que se respeten la so integridá física y  derechos fundamentales”. 

Pa la eurodiputada d'IX nun hai duldes de que “les detenciones indiscriminaes, les tortures, les condenes illegales d'activistes y periodistes, la violencia policial nes manifestaciones demuestren la brutal naturaleza d'un réxime colonial como'l de Marruecos”. Pero tamién, señaló, “la movilización y fortaleza del pueblu saharagüi pal cual namá hai una salida: el referéndum d'autodeterminación esixíu pola mesma ONU”.