Menu

Refuga que Desenvolvimientu Rural caltenga a Tragsatec nel saneamientu

Izquierda Xunida refuga'l planteamientu que la conseyera de Desenvolvimientu Rural esplicó esta mañana na Xunta Xeneral pa solucionar el despidu de los veterinarios de Tragsatec despidíos a primeros d'añu. María Jesús Álvarez plantegó, nuna interpelación de la diputada d'IX María José Miranda, que nun  va rescindir el contratu de la campaña de saneamientu ganaderu d'anguaño a Tragsatec, a pesar de los 18 despidos de veterinarios, y va ser l'añu que vien cuando va encamentar a la empresa pública asturiana Serpa esti llabor. Pa la conseyera prescindir de los servicios de Tragsatec anguaño supondría dexar l'actual campaña de saneamientu ensin execución. La diputada d'IX dempués de preguntar qué van faer mientres los despidíos, convidó al executivu a que los  veterinarios despidíos faigan la campaña de pidimientos.

La diputada d'IX reprochó a la conseyera por qué nun modificar hai yá dos años esta encomienda de xestión a la empresa Tragsa cuando sabía que diba executar un ERE, lo que supunxo una perda de dos años ensin tener un Plan B. "Nun lo acabamos d'entender", alvirtió de la que recordó una intervención d'Aurelio Martín alvirtiendo esti asuntu nel añu 2014. Miranda prefirió pensar que nun esiste una vendetta nos despidos, de casualidá d'aquellos incluyíos nel alcuerdu de 2005 ya inscritos nominalmente na encomienda de xestión.

María José Miranda punxo en dulda qu'esta campaña de saneamientu vaya a salir bien, metanes un conflictu llaboral, con dos semana de retrasu que yá lleva y con menos profesionales n'activu. "Deséu que lo llogre pero ye un retu importante y creo que los ganaderos van salir perxudicaos", dixo.

La diputada d'IX recordó que los trabayadores despidíos tán pagando la mala estructura empresarial de Tragsa, una empresa estatal y empobinao pol PP y sufriendo que'l gobiernu del PSOE siga encamentándolos trabayu mientres apliquen un ERE. A lo último, Miranda alvirtió a la conseyera de que dada la situación "empiezo a duldar de qu'usté tenga de tar sentada ende" y demandó-y "fechos" y el cumplimientu del alcuerdu parlamentariu de 2005 pol que se caltuvo l'empléu pa los veterinarios agora despidíos y el pliegu de condiciones del contratu con Tragsatec.