Menu

Marta Pulgar demanda derechos y non caridá

Marta Pulgar, diputada d'IX na Xunta Xeneral, reclamó esta mañana la redacción y aprobación de la Llei de Garantía de Derechos Sociales Básicos, incluyida nel alcuerdu de investidura robláu pola coalición cola FSA-PSOE pa garantizar al traviés d'una llei, y como derechos suxetivos, aquellos a los que tien derechu cada asturianu y estos nun se conviertan en caridá como dalgunos pretenden –n'alusión al PP-. La diputada demandó nuna entruga a la conseyera de Derechos Sociales conocer los plazos y les actuaciones que va incluyir el Gobiernu nesa llei yá que, al so xuiciu, “la precariedá nun puede esperar”. Pulgar tamién recordó que la coalición nun fala de gastu sinón de derechos sociales y toa inversión, nesti sentíu, “ta bien fecha”.

La conseyera de Derechos Sociales, Pilar Varela, respondió qu'el so equipu ta cavilgando pa enmarcala nuna nueva Llei de Servicios Sociales pa faer una normativa que guarde coherencia de principiu a fin. “Lo más importante ye intentar centrar los nuesos esfuerzos en da-y coherencia a toles prestaciones que tán funcionando y reforzales”, esplicó la conseyera, dempués de citar el Plan de Garantía Habitacional, apocayá presentáu, el compromisu de qu'antes del mes de xunetu va tar fecha la revisión de los espedientes del salariu social o la inversión nel plan alcordáu de servicios sociales, qu'inclúi un alcuerdu con EDP pa evitar les cortes de lluz o'l refuerzu del plan de llucha contra la probeza infantil, ente otros.

Marta Pulgar preguntó por si'l Plan de Garantía Habitacional recibió les aportaciones del Conseyu Autonómicu de la Vivienda y si ésti plan va sirvir como evaluación del anterior Plan de Vivienda y impulsor del próximu. Tamién espresó'l so deséu de que coles revisiones del salariu social cumplanse los plazos y tean llistos antes del branu. Nesti sentíu, Varela asumió que se trata de “un retu” pal que tán trabayando 50 persones.