La Xunta Xeneral del Principáu aprobó esta mañana por unanimidá de tolos grupos de la Cámara la Proposición Non de Llei presentada por IX na qu'establez la defensa del sector del carbón como un sector irrenunciable, pide'l cumplimientu del Plan del Carbón y encamienta a establecer un frente común pa caltener l'actividá más allá de 2018.
Esactamente los puntos de la Proposición Non de Llei aprobada son los siguientes:
1. La Xunta Xeneral del Principáu manifiesta'l so compromisu cola defensa del sector del carbón y de la so esplotación como recursu natural de forma sostenida y sostenible, como un derechu irrenunciable y fundamental pa la nuesa Comunidá Autónoma.
2. La Xunta Xeneral del Principáu encamienta al Conseyu de Gobiernu a esixir del Gobiernu del Estáu que cumpla de manera estricta ya inmediata l'alcuerdu “Marco d'Actuación pa la Minería del Carbón 2013-2018”, suscritu n'ochobre de 2013 coles organizaciones sindical y patronal, bien especialmente no que se refier al establecimientu de los mecanismos necesarios que dexen garantizar el consumu de carbón nacional nos términos reflexaos en dichu alcuerdo.
3. La Xunta Xeneral del Principáu encamienta al Conseyu de Gobiernu a promover de forma urxente acordies con les organizaciones sindicales representatives nel sector, el conxuntu de fuerces polítiques na nuesa comunidá autónoma y los conceyos de les Cuenques Mineres, l'establecimientu d'una posición común que nel ámbitu de la Unión Europea dexe revertir el conteníu de la Decisión 787/2010 UE, buscando la collaboración en dicha posición común tantu d'otres comunidaes autónomes como del Gobiernu del Estáu.
A xuiciu d'Ovidio Zapico, diputáu d'IX encargáu de defender esta iniciativa, esta Proposición Non de Llei significa espresar el compromisu cola defensa del sector, cola necesidá de llograr ente toos un nuevu programa pa les ayudes al carbón nacional, porque ensin elles los emplegos de la minería tán condergaos a una progresiva desapaición, una y bones el carbón nacional nun ta en condiciones de competir con un carbón como'l procedente de países como Colombia, onde s'estrayi un carbón enllordiáu con sangre de sindicalistes; un carbón enllordiáu col sudu de neños que trabayen nunes condiciones de semi-esclavitú. Un carbón, a última hora, dixo'l diputáu d'IX, que se llogra ensin tener en cuenta'l mínimu respetu a preceptos llaborales o medioambientales y que, por tanto, “ye un deslleal competidor del nuesu".
Ovidio Zapico demandó tamién la garantía de consumu de carbón nacional, recoyíu nel Marcu d'Actuación pa la Minería 2013-2018 pa que ésti nun quede en papel moyáu y establézanse los mecanismos necesarios por que se cumpla. “El Gobiernu del Estáu tien d'exercer les sos funciones, valga la redundancia, y el próximu tien de trabayar dende'l primer día pa enmendar esta situación. Precisamos un Ministru d'Industria comprometíu cola defensa del sector·, alvirtió.
IX cree de vital importancia promover un frente común, acordies con les organizaciones sindicales de los mineros. Un frente común, esplicó nel que participen partíos políticos, conceyos mineros y gobiernu del Principáu y que llogre revertir les decisiones de la Unión Europea y establecer un marcu de futuru por que la minería asturiana sobreviva al 2018 y una parte bien importante d'Asturies pueda siguir viva.
Ovidio Zapico sorrayó na so intervención el momentu especialmente dramáticu pal sector, cuando nun fai nin 48 hores que conocíamos que Bruxeles, que la Unión Europea, refuga'l sistema propuestu pol Ministeriu d'Industria pa incentivar el consumu de carbón nacional al traviés d'ayudes a les empreses eléctriques por que éstes encaren les inversiones necesaries p'afaese a la directiva europea d'emisiones industriales. “Decisión que yá se vía venir porque nun cuntaba col informe favorable de la mesma Comisión Nacional del Mercáu de Valores, y qu'a éstes nun taba mal que se comunicara oficialmente al nuesu Gobiernu, a la patronal y a los sindicatos, que se tuvieron qu'enterar por terceros”, esplicó.
El diputáu d'IX acusó al PP de que los últimos cuatro años fueron de inanición y pasividá per parte del Gobiernu Central, qu'emponen a la minería a una situación desaxeradamente complicada, cuantimás a la minería privada, aquella que da emplegu entá a 1000 mineros nel Suroccidente d'Asturies, y preguntóse ¿qué va ser de Degaña, de Cangas, de Ibias, d'Ayande, de Tinéu ensin estos emplegos?
La minería del carbón ye, dixo, una de les nueses señes d'identidá, tantu social como económicamente y entá güei sigue siendo una importante actividá económica que da emplegu a casi 3000 trabayadores, teniendo amás la nuesa Comunidá unu de los yacimientos carboníferos más importantes d'Europa, a que la so esplotación sostenible nun tenemos d'arrenunciar, en tantu y cuanto ye un recursu estratéxicu de gran valor.
¿Por qué si acaben les mines van a crear na superficie de les nuestres Cuenques Mineres Centrales los casi 2000 puestos de trabayu que siguen xenerando'l Pozu Carrio, Mª Luisa, Santiago y Nicolasa?. Enforma tarrezo que non, y a la política de reindustrialización de los últimos años unvio, alvirtió pa concluyir.
Diputáu Autonómicu y Coordinador d'IX
Diputado Autonómico
(Mas Asturies)
Diputada Autonómica
Convocatoria por Asturies