Menu

“Queremos que les víctimes, represaliaos y les sos families tengan un mínimu de xusticia”, señala la diputada Concha Masa

Los grupos parlamentarios d'IX y Podemos van buscar el sofitu del restu del parlamentu pa sofitar la denominada ‘Querella Arxentina’ que lleva alantre la maxistrada María Servini por delitos de xenocidiu y lesa humanidá contra los responsables de la conculcación de los derechos humanos mientres el franquismu y anima a la ciudadanía a sofitar la querella contra los crímenes del franquismu, bien personándose como querellantes quien fueron represaliaos mientres el réxime franquista o sían parientes de quien lo fueron, o bien manifestando la so denuncia de la dictadura y la so adhesión a la querella contra los crímenes y criminales. Tamién encamienta a los conceyos asturianos a sofitar dicha querella, personándose como querellantes. La Proposición Non de Llei que se va encetar el vienres na sesión plenaria denuncia la sublevación militar fascista empobinada por Franco contra'l réxime republicanu lexítimamente constituyíu nel añu 1931 y la posterior guerra qu'acabó col citáu réxime constitucional y democráticu, según el réxime dictatorial posterior que mientres cuarenta años reprimió a sangre y fueu toa muerte de disidencia y llucha pola llibertá, la xusticia social y los derechos individuales y colectivos.

De la mesma, la Xunta Xeneral del Principáu comprometese a adoptar les midíes necesaries pa garantizar a los represaliaos y represaliaes pola sedición militar de xunetu de 1936 y el terrorismu d'Estáu instauráu pol réxime franquista l'exerciciu del so derechu a la verdá sobre la naturaleza d'aquel réxime pa compensar los intentos de rescribir la hestoria que se vienen realizando; el derechu a la xusticia efectiva, por aciu la que pueda superase l'estáu actual d'impunidá de los responsables de los crímenes de lesa humanidá cometíos, y el derechu a un arreglu dignu y non discriminatoria poles vulneraciones causaes a los centenares de miles de víctimes del franquismu; y, a lo último, el derechu del conxuntu de la sociedá a que s'implementen midíes de cambeos sociopolíticos, xurídicos ya institucionales como garantía de non repetición.

La intención de los grupos firmantes ye qu'Asturies siga la llínea de los parlamentos de Cataluña, País Vascu y Andalucía qu'aprobaron mociones nesti mesmu sentíu, al igual que 19 conceyos asturianos.

Concha Masa, diputada d'IX, recordó'l llevantamientu militar del 36, los 40 años de dictadura franquista y la comisión de tou tipu de crímenes cometíos n'España, l'incontable númberu de víctimes, muertos, sumíos, exiliados, tortures, cárcel ya inclusive  robu de neños… unes situaciones que nun prescriben como alverten numberosos organismos internacionales, qu'obliguen a investigar los casos, buscar los culpables, xulgar los casos y castigar a los culpables yá que constitúin crímenes de lesa humanidá.

“Queremos que les víctimes, represaliaos y les sos families tengan un mínimu de xusticia, que non de vengación”, esplicó la diputada d'IX.