Menu

Concha Masa pregunta por una inversión de 150.000 euros comprometida l'añu pasáu. Carmen Conde va introducir un ruegu nel plenu municipal

La diputada d'IX, Concha Masa, responsable d'Educación nel grupu parlamentariu, visitó esta mañana l'Institutu d'Educación Secundaria Virxe de la Lluz, n'Avilés al pie de la conceyala d'IX d'Avilés, Carmen Conde y el Secretariu d'Organización d'IX de Corvera, Jesús Gómez.  Según la diputada d'IX el centru educativu de secundaria atopase nuna situación penosa por cuenta de los múltiples mugores qu'aquexen a tol edificiu. Previo a la visita, la diputada yá rexistró una entruga pa la so respuesta por escritu a la Conseyería d'Educación esquizando cuál ye la situación d'una partida de 150.000 euros comprometida pa la meyora del institutu nos presupuestos del añu pasáu, cuantía que nun foi executada, y si  ésta va a executase anguaño.

Concha Masa, que percorrió les instalaciones d'esti institutu al pie de Carmen Conde, miembros de la dirección del mesmu y de l'Asociación de Padres y Madres, espera una respuesta positiva per parte de la Conseyería ante la induldable necesidá de meyores del edificiu. De lo contrario, va tomar otru tipu d'iniciatives nel parlamentu asturianu.

Nel planu municipal, la conceyala Carmen Conde tamién confirmó a la dirección del centru y a los padres presentes na visita que va llevar esti asuntu al plenu avilesín pa que sía tratáu nel apartáu de ruegos y entrugues. Conde sorraya que la situación del IES La Lluz ye “desastrosa” y que la instalación “va tirando” frutu de que destinen “recursos propios a dir parcheando” un edificiu de 50 años, “pensáu pa Almería y non p'Asturies”. La conceyala, que recuerda que son 400 los alumnos qu'alleguen a diariu al institutu, tamién apunta que l'edificiu tien un problema d'accesibilidá, cuidando qu'escarez d'ascensor. “Precisen  esos 150.000 euros presupuestaos anque nun sé si, con too y eso, podríen arreglar tolo que tienen qu'iguar”, diz Conde.