Menu

La vocera axunta d'IX na Xunta Xeneral del Principáu, Concha Masa, rompió güei una llanza a favor de la sanidá asturiana, asegurando que, a pesar de qu'esisten aspeutos a ameyorar, tratase d'unu de los sistemes de más calidá del Estáu.

Masa criticaba d'esta forma'l pidimientu realizáu polos grupos de FORU y PP pa convocar un Plenu Estraordinariu nel que falar de la situación de la rede pública de salú, al entender que se trata más d'un allugamientu "de cara a la galería" que d'una iniciativa cabal p'ameyorar l'atención. Ye un Plenu lexítimu, esplicó la parllamentaria que, sicasí, punxo en cuestión la so utilidá, más porque nestos momentos ta en marcha una comisión d'investigación sobre lo que calificó como unu de los principales problemes de la sanidá asturiana, como son les llistes d'espera.

"Entendemos que cuando se forma una comisión parlamentaria ye necesario dexala desenvolver el so trabayu, que lo ta faciendo de forma bien seria, de forma intensiva mientres esti mes de xunetu, va siguir posiblemente en septiembre, y esperemos que dea los sos frutos, ente que'l Plenu va ser a cencielles una toma de posiciones, como dicía, de cara a la galería".

Pa Concha Masa la posición de los partíos de la derecha ye poco comprensible, más porque naquelles Comunidaes Autonómes onde gobernaron o gobiernen, como Madrid, punxeron en marcha polítiques devaluadores del sistema públicu sanitariu, en favor d'una paulatina y progresiva privatización de los sos servicios.