Menu

Ovidio Zapico y Antonio Pino piden midíes p'acabar col "esperpento" nel emblemáticu establecimientu

El conflictu del Reconquista volvió güei al Parlamentu d'Asturies, onde'l diputáu d'Izquierda Xunida Ovidio Zapico reclamó al Gobiernu la rescisión del contratu a l'axudicataria de la xestión del Hotel, ante una situación calificada de "esperpento valleinclanesco" en palabres del secretariu xeneral de CC OO, Antonio Pinu.

Zapico amosó güei la so perplexidá ante la posición del Gobiernu d'Asturies sobre'l conflictu del hotel Reconquista. Según el parllamentariu, el conseyeru Francisco Blanco reconoz que na xestión del establecimientu hai una subrogación de personal pero, al tiempu, escaezse del caltenimientu del emplegu. El diputáu esixó que se tomen midíes contra la empresa axudicataria, por culpa de que yá se reconocieron dos despidos improcedentes, cola fin de poner puntu y final al procesu de decadencia que se ta viviendo nel buque insinia de la hoteleria" d'Asturies.

P'Antonio Pino, que siguió la sesión plenaria dende la tribuna d'invitaos, al pie d'un nutríu grupu de trabayadores del Hotel, les esplicaciones del Conseyeru Francisco Blanco nun respondieron a nengunes de les cuestiones plantegaes. "Tamos ante un problema de calter políticu que se sofita nuna sentencia que reconoz, claramente, qu'hai un fraude de llei na manera d'actuar de Hotusa con sos trabayadores"

El secretariu xeneral de CC OO aseguró que la xestión de Hotusa, que supunxo la perda de 22 emplegos desque asumió la xestión del emblemáticu establecimientu, ye incompatible con un gobiernu que se reclama izquierda. "¿Cómo puede tener contratada con dineru público a una empresa qu'una sentencia diz que constrúi pruebes pa despidir trabayadores . Eso ye impresentable"

Antonio Pino anunció que solicitaríen de momentu una xunta col Principáu pa esixir, d'una vegada por toes, la rescisión del contratu y que se busquen salíes pa evitar una nueva sangría nel emplegu.