Menu

Concha Masa, diputada responsable d'Educación nel grupu parlamentariu, pide axilidá a la Conseyería d'Educación pa resolver de forma definitiva la tramitación de les beques predoctorales Severu Ochoa.

“Ye importante que los meyores estudiantes de la nuesa Universidá dispongan  d'una solución de continuidad si quieren dedicase a la investigación y non que tengan que buscar recursos n'otros llugares, porque dempués vamos tener qu'intentar recuperar el talentu”, alvierte la diputada d'IX. Concha Masa, que recuerda qu'una de les “escases salíes” pa estudiantes destacaos son estes beques d'investigación pa realizar la tesis doctoral y “ye importante pa ellos saber si disponen d'elles o non nun plazu curtiu de tiempu”. A xuiciu de la diputada nun ye relevante pa los estudiantes qué departamentu de l'alministración fai les xestiones, sinón qu'éstes se realicen en tiempu y forma pa que nun perxudiquen al eslabón más débil, l'estudiante.

IX espera que la Conseyería, d'una vegada por toes, porque “yá ye xuegu xugáu”, entaíne los trámites p'asegurar les beques, que les convoque añu a añu y resolver con eficiencia. “Creemos qu'esti ye un problema de voluntá política porque técnicamente nun hai nengún problema pa que puean resolvese  primero qu'empiece el cursu”, esplica la diputada d'IX.