Menu

Izquierda Xunida va esixir al principáu alternatives pa garantizar la calidá na atención del hospital de Xarrio.

El coordinador xeneral de la formación, Ramón Argüelles, resumió la so propuesta en trés cuestiones, dos de calter específicamente sanitariu, referíu a reforzar la plantiya dotándola de los abondos recursos de personal y a la meyora de la cartera de servicios y una tercera de calter xeneral, dirixida a ameyorar los servicios públicos de tresportes, como elementu clave pa que la población pueda aportar al recursu sanitariu.

Ramón Argüelles allegó güei, al pie de la diputada Marta Pulgar y la secretaria de política municipal de la formación, Gabriela Alvarez, a Xarrio, pa reivindicar una solución que garantice servicios y ameyoralos. Pa Marta Pulgar, ye poco asumible que la Conseyeria de Sanidá, per un sitiu, pongalu centru como "modelu" y, casi al tiempu, la xerencia de l'área plantegue que l'Hospital reorientese pa l'atención a crónicos y patolóxicos. Nesti sentíu, añedió la parllamentaria, esa reorientación nun puede llindase a esti centru, sinón que, dáu l'avieyamientu de la población asturiana, tien de ser tenida en cuenta de manera xeneral, incluyendo l'atención primaria. Sía que non, afirmó Pulgar l'Hospital de Xarrio tien que funcionar como un hospital con capacidá p'atender a la población y non yá pa enfermedaes de tipu crónicu.

Una de les alternatives, a xuiciu d'IX, pue ser la coordinación con Avilés en materia de personal, de forma que puedan garantizase servicios en Xarrio.

IX presentó nel Parlamentu asturianu una proposición non de llei na qu'inclúi esi refuerzu de personal,  cartera de servicios y meyora del tresporte, y realizó una batería d'entrugues pa saber qué ta faciendo l'alministración sanitaria de cara a realizar un plan estratéxicu que garantice'l funcionamientu y l'atención del Hospital de Xarrio.

En Xarrio, Argüelles y Pulgar tuvieron al pie de miembros de la formación en Navia, ente ellos, la coordinadora local, Agustina Juanes, Julio César Suárez, y el voceru de la formación nel Conceyu naviegu Ignacio Blanco.

Ramón Argüelles aseguró que pa IX ye imprescindible garantizar l'atención sanitaria a tola población, con independencia de si se tratare de población rural o urbana. Nesti sentíu, reclamó especial atención a les zones rurales, más si pretende evitase el despoblamientu daqué que pasa, dixo, por ufiertar servicios , empezando polos sanitarios.