Menu

Ramón Argüelles pide que se garantice una sanidá calidable, tantu pa zones urbanes como rurales

Marta Pulgar reclama que'l contratu de collaboración cola área de Xixón sirva tamién p'ameyorar l'atención hospitalaria de Les Arriondes

Izquierda Xunida va esixir al Principáu d'Asturies que defina una cartera de servicios y prestaciones y el plan d'inversiones pal Hospital del Oriente, según el refuerzu de l'atención de los centros de salú. L'oxetivu, según esplicó güei en Llanes el coordinador xeneral, Ramón Argüelles, ye ufiertar una sanidá calidable, ensin importar onde se viva, poniendo como meta llograr que la población de les zones rurales tengan tantos derechos como les de les árees urbanes.

Na visita a Llanes, la diputada Marta Pulgar circunscribió les esixencies sanitaries pa l'área oriental d'Asturies nel contestu xeneral de la Comunidá Autónoma, onde, al so xuiciu, ye imprescindible tomar midíes que garanticen l'afayadiza atención a la población asitiada fora del núcleu central de la rexón. “Somos conscientes de que na zona del oriente hai ciertes faltes, fundamentalmente cola planificación de les inversiones del propiu hospital del oriente. Esiximos que'l Gobiernu del Principáu defina esa planificación y, de xacíu tamién, de la cartera de servicios que s'empresta nesi hospital y nos centros de salú”.

Asina mesmu, para IX ye necesariu que se clarifiquen los contratos qu'hai cola área de Xixón y que nun pueden suponer, alvirtió Pulgar, en nengún casu, “que solo se muevan los usuarios”. Nesti sentíu, la diputada aseguró qu'estos contratos tienen de ser una oportunidá” p'ameyorar la cartera de servicios del propiu hospital, incluyendo'l movimientos pa l'atención in situ de los profesionales sanitarios.

Les faltes xenerales de la sanidá na área oriental tien, esplicó Marta Pulgar, componentes tamién estacionales que ye posible y necesariu resolver, en referencia a sustituciones, vacantes y refuerzos indispensables si quier atendese la medría esponencial de la presión asistencial nos meses vacacionales.

Escueles rurales

Na axenda del día, los responsables d'IX n'Asturies, Llanes y Parres, encetaron tamién la situación de precariedá de munches escueles rurales na zona oriental. El voceru de la formación nel Conceyu llaniscu, Javier Ardines, denunció les condiciones llamentables” de delles d'elles y la indolencia del Principáu, que se desabrió de cualquier tipu d'ayuda, cargando a l'alministración local el caltenimientu d'estes infraestructures.