Al navegar por esta web acepta la utilización de cookies para análisis y personalización
Saber más    

Noticies Toles noticies d´IX

09/03/2017

IX defende nel parlamentu la escuela pública, gratuita, laica, ya inclusiva

Concha Masa sostien que'l dineru público nun tendría de tresferise a quien faen de la educación un negociu

Nel día de la fuelga xeneral d'Educación, la diputada d'IX Concha Masa defendió nel Parlamentu asturianu una escuela pública, gratuita, laica, universal, inclusiva, coeducativa, integral y democrática frente a una escuela alcordada que supon un modelu segregador y nun garantiza la vertebración social. Asina lo esplicó la diputada d'IX nuna entruga al conseyeru d'Educación, Genaro Alonso.

La diputada d'IX demandó suprimir un modelu que practica la segregación del alumnáu y que, en munchos casos, nun respeta'l calter laicu que tien de tener la educación como reconoz la Declaración de Derechos del Neñu, polo que pidió que la relixón sala de la escuela.  “ El dineru público nun tendría de tresferise a quien fai de la educación un negociu”, dixo nel parlamentu asturianu.

Concha Masa incidió na necesidá d'esixir al Gobiernu terminar colos retayos educativos (con un retayu nos presupuestos de les alministraciones del 11%), la derogación de la LOMCE, la recuperación de les plantiyes docentes, la puesta en marcha d'un sistema de beques que garantice la igualdá d'oportunidaes, la eliminación de les contrarreformes universitaries y de les práctiques non remuneraes en FP, ente otres cuestiones. Tamién na necesidá de consiguir  la recuperación de les plantiyes docentes, la dinificación de les condiciones llaborales del profesoráu, el frenu a la privatización del sistema educativu, la baxada de ratios d'alumnáu per aula, la recuperación de toles midíes d'inclusión y atención a la diversidá y un alcuerdu social por un pactu educativu onde la comunidá educativa sía la so protagonista Masa denunció que la LOMCE aplicase n'Asturies ensin paliativu dalgunu. “Esta llei, que tien el refugu de la mayoría del parlamentu, sigue aplicándose, a pesar de les propuestes que los espertos fixeron pa evitar daños irreversibles”, dixo na so intervención.

Nella establecen les pruebes esternes, los rankings y la competitividá ente centros y blíndense unos privilexos tresmandaos pa la relixón católica, la segregación por sexu pagada con dineru público, un modelu autoritariu que na práctica suprime la democracia nos centros educativos y dexa imponer direcciones a deu; y la meyora na privatización de lo público pa fortalecer la rede privada-alcordada, convirtiendo la educación pública en subsidiaria, ensin asumir la obligación d'ufiertar places públiques abondes en tolos sitios, dixo dende la tribuna de la Xunta Xeneral.

Ello ye que nun ye casual qu'anguaño se buscó'l subterfuxu d'evitar les convocatories d'oposiciones al cuerpu de maestros nes CCAA cola escusa de l'aprobación de los Presupuestos Xenerales del Estáu, esplicó la diputada d'IX.

La diputada d'IX  aseguró que'l financiamientu públicu d'una rede educativa privada creó un modelu segregador que conduz al esmantelamientu progresivu del modelu d'escuela pública como un proyectu solidariu de vertebración social. Nun ye compatible un sistema públicu calidable cola crecedera de la rede privada sostenida con fondos públicos, necesariamente selectiva y xeneradora d'un mercáu educativu que multiplica les desigualdaes. “A nengún empresariu puede prohibíse-y crear centros privaos, nin a nenguna familia llevar ellí a los sos fíos, pero non a mariña del presupuestu públicu. El dineru público nun tendría de tresferse a quien fai de la educación un negociu”, alvirtió.

El conseyeru d'Educación y Cultura, Genaro Alonso, aseguró na Xunta l'apueste de la so    conseyería y del Gobiernu socialista pola educación pública. “Apostemos y siguimos faciéndolo pola escuela pública con decisión porque ye daqué irrenunciable pa esta conseyería y esti gobiernu, pero tamién de manera harmonizada colos centros alcordaos”, dixo Alonso.

Nesti sentíu'l conseyeru anunció que güei o mañana van faer públicos les relaciones medies d'alumnos por localidá que va sirvir pa decidir qu'unidaes o nun suprimense de los centros alcordaos. Aportunó en que nun van aumentar nengunu de los conciertos porque “pa eso tenemos places abondes nos centros públicos”.

Alonso aseguróque los gobiernos socialistes siempres impulsaron la enseñanza pública porque consideren que los centros públicos son el sistema vertebrador de la educación y nesti sentíu indicó qu'Asturies ta percima de la media estatal y ente les comunidaes nes que la enseñanza pública representa más del 70% de la rede, concretamente'l 72% nel casu del Principáu.

Por tantu dixo que “nun cree que se precise reorientar les polítiques educatives sinón calteneles ya impulsales”.

Volver

Compartir

2014 Izquierda Xunida d'Asturies - Política de privacidad - Política de cookies