Al navegar por esta web acepta la utilización de cookies para análisis y personalización
Saber más    

Noticies Toles noticies d´IX

La Xunta, como demandaba IX, esixe al Gobiernu mayor seguridá xurídica nos planes d'emplegu

La iniciativa foi sofitada por PSOE, Podemos y Foru

La Xunta Xeneral aprobó esta mañana la Proposición Non de Llei d'IX que pide'l cambéu de los planes d'emplegu locales, estableciendo cambeos, ente otres cuestiones, nes bases reguladores de les subvenciones pa dotar de mayor seguridá xurídica a los conceyos. Los cinco puntos de la iniciativa d'IX fueron sofitaos pol PSOE, Podemos y Foro ente que votaron en contra Partíu Popular y Ciudadanos.

Ovidio Zapico, diputáu d'IX, mientres la so intervención defendió la necesidá de los planes d'emplegu, ensin entrar a valorar la so execución, como mediu d'inclusión  social y llaboral de los postreros 25 años, pero tamién sorrayó'l so constante cayente debíu nos últimos años a la inseguridá xurídica que llevó a los conceyos a tener qu'abonar 10 millones d'euros n'indemnizaciones. Zapico recordó qu'en 2012, había más de 2.000 places ocupaes, ente que nel últimu añu cubriéronse pocu más de 500 places. Anguañu, amás, arrenunciaron a ponelos en marcha los conceyos de Siero, Mieres, Llangréu, San Martín, Avilés y Xixón, esti postreru en  suspensu.

Zapico alvirtió al Gobiernu qu'IX vese obligada a faer midíes propositives “porque'l Gobiernu y la so inacción provoquen la muerte de los planes d'emplegu”.

El diputáu d'IX preguntó si como diz la directora del Sepepa los planes son seguros y executables “¿porqué'l Principáu nun quier faese responsable subsidiariu de los problemes que se-yos xeneren a los conceyos?”.

El primer puntu de la Proposición non de llei supón la reconocencia de la utilidá de los planes como métodu d'insertamientu llaboral de colectivos con especiales dificultaes. En segundu llugar el parlamentu encamienta a amontar y ameyorar los programes sociales d'incorporación al trabayu de paraos de colectivos con especiales dificultaes pal emplegu amontando los  recursos naturales y humanos. En tercer llugar la iniciativa aprobada encamienta al gobiernu a presentar  primero qu'acabe l'actual periodu de sesiones un informe xurídicu qu'analice'l conxuntu de les sentencies con cuenta de que s'estableza una relación de bones y males práctiques nesos contratos y ufierte lluz sobre les posibilidaes y les llendes llegales neses contrataciones.

El cuartu puntu reclama modificar les bases reguladores de la concesión de subvenciones a los conceyos del Principáu d'Asturies pa la execución de Planes d'Emplegu, riquir a que presenten, pa la so evaluación y aprobación pol Principáu con calter previu a dicha concesión, un Plan global d'actuación por aciu el cual, y en collaboración colos representantes sindicales, defínanse los oxetivos a satisfaer y nel que s'afite'l marcu d'actuaciones a desenvolver, puestos de trabayu precisos pal so llogru, y descripción individualizada de cada unu d'esos puestos de trabayu, de manera que se garantice la sustantividad y l'autonomía de la obra o serviciu.  Dichu Plan tendrá d'establecer un mecanismu de control del cumplimientu de les bases (que tendrán d'incluyir el tipu de contratu que se va a realizar y l'horariu, condiciones, y finalidá del mesmu) nel que participaríen tanto representantes del serviciu d'emplegu como de los axentes sociales.  

L'últimu puntu d'esta Proposición Non de Llei supon que'l Principáu estudió la incorporación de nuevos empleadores tantu nel sector públicu como del tercer sector non codalosu, l'ampliación de la duración de los contratos más allá d'un añu y la meyora de les condiciones salariales de los trabayadores beneficiarios.

Volver

Compartir

2014 Izquierda Xunida d'Asturies - Política de privacidad - Política de cookies