Menu

Ramón Argüelles cree que ye “impresentable” qu'Asturies inda nun roblara'l conveniu, a un añu del final del periodu de vixencia, y nun acepta que'l conseyeru diga que ye igual un mes o dos más

Ramón Argüelles, coordinador xeneral d'IX d'Asturies, considera que'l Conseyeru d'Industria, Francisco Blanco, ta baillando l'agua al Ministeriu d'Industria en relación a los Fondos Mineros, a xulgar poles sos declaraciones tres la xunta qu'ayeri en Madrid. Blanco aseguró qu'en relación a la falta de firma de conveniu sobre Fondos mineros ente'l Principáu y el Ministeriu, que “nun tien mayor trescendencia esperar un mes más, o dos meses más, porque nun esiste dotación presupuestaria pa los fondos mineros". A xuiciu del coordinador d'IX, el Conseyeru d'Industria tendría de tener en cuenta les siguientes puntualizaciones y ufiertar una respuesta a les interrogantes qu'entá siguen abiertos tres la xunta d'ayeri.

Ensin la firma d'esti conveniu Asturies nun puede captar nin un solu euru de financiamientu pa proyectos públicos de reactivación de les contornes mineres procedente del Marcu d'actuación pa la minería del carbón y les contornes mineres nel periodu 20132018. Tando yá somorguiaos nel penúltimu añu del sexeniu de vixencia del Plan, ye impresentable que nun se dio nin siquier el primer pasu pa faer posible la llegada a Asturies de siquier una parte de los 250 millones comprometíos por esi conceutu.

Aludir a la falta d'aprobación del Presupuestu Xeneral del Estáu (PGE) como escusa, sicasí Castiella y Llión robló dichu conveniu n'ochobre de 2016 ensin que pa ello se punxera reparu dalgunu. Verdaderamente, la firma del conveniu nun contempla compromisos económicos concretos pero establez el marcu regulador que dexa l'aprobación de proyectos concretos y la so llicitación posterior. Esto ye, la falta de firma d'esi conveniu cuando los PGE resulten nel so casu aprobaos va asitianos, a Asturies, n'inferioridá de condiciones al respective de la comunidá vecina. Va Implicar más retrasos sobre los retrasos ante la mirada coimbre d'un Conseyeru del que se debería esperar una actitú esixente y reivindicativo.

Per otra parte, el Conseyeru anunció qu'el so departamentu yá remanaba una llista de proyectos susceptibles de ser financiaos por aciu estos fondos, escoyíos “de manera oscurantista”, porque entá nun se conocen los proyectos del Gobiernu del Principáu que pretende que Madrid apruebe, la metá de los previstos p'Asturies según l'alcuerdu al que se llegó colos conceyos mineros. De confirmase esti planteamientu, podríamos tar ante l'incumplimientu de la Moción aprobada pola Xunta Xeneral del Principáu'l mes pasáu, col votu afirmativu del PSOE, pola que s'encamiento al gobiernu a ellaborar un Plan apautáu pa les Cuenques mineres en función d'una serie de criterios y prioridaes y dientro d'una estratexa d reactivación de les contornes mineres, alvierte Ramón Argüelles. Ello paez incumplise cola propuesta del Conseyeru, que nun tien apariencia de ser más qu'un mecigayu de propuestes sacaes de la manga ensin orientación estratéxica nin alcuerdu dalgunu colos otros actores implicaos. Ante esta situación, IX va pidir la comparecencia del Conseyeru y apellará-y sobre estes cuestiones en see parlamentaria.