Menu

Ovidio Zapico reclama al Conseyeru d'Industria que consensúe con sindicatos y territorios los proyectos a financiar con fondos mineros

El diputáu d'IX Ovidio Zapico pidió güei esixencia y firmeza al conseyeru d'Industria, Francisco Blanco, frente al Gobiernu Central, en tou lo tocante al desenvolvimientu del Marcu de la Minería 2013-2018 y que se consensúen cuanto antes los proyectos a desenvolver con sindicatos y cuenques mineres con independencia de que s'aprueben los Presupuestos Xenerales del Estáu. El parllamentariu recordó qu'Asturies nun ta “pedimiando nada” cuando rique recursos pa les cuenques mineres. “Tamos esixendo que se cumpla lo apautao, y lo apautao llográronlo los sindicatos y la población civil de les Cuenques, frutu de la movilización y de la negociación”.

Zapico manifestó la so esmolición ante'l próximu fin d'esti marcu operativu ensin que, inda se desenvolvieren importantes aspeutos del mesmu lo que va obligar, aprofió, a dir a una prórroga. “Sería bien importante que'l conseyeru consensuara definitivamente los proyectos qu'Asturies va presentar colos sindicatos y colos Conceyos de los territorios mineros y que roblara yá esi conveniu col Ministeriu, con independencia de qu'haya presupuestos xenerales del Estáu”. L'oxetivu, aportunó'l diputáu, tendría de ser “dir ganando tiempu, al igual que yá fixo Castiella y Llión”.