Menu

Gaspar Llamazares presenta siete enmiendes a la iniciativa pa garantizar que'l sistema tributariu se base nos principios de progresividá fiscal y xusticia redistributiva

Izquierda Xunida presentó siete enmiendes a la Proposición non de Llei sobre midíes de llucha contra'l fraude fiscal presentada por Podemos y que se va aldericar nel Plenu de mañna vienres na Xunta Xeneral del Principáu. L'oxetivu de diches aportaciones d'IX ye dexar clara la necesidá de qu'el nuesu sistema tributariu se base nos principios de progresividá, suficiencia y xusticia redistributiva que dexe financiar el modelu social de bienestar que demanda la ciudadanía, principios que nun queden escamplaes na iniciativa de Podemos. IX considera que se trata d'una iniciativa sobremanera estatal y que, en relación a Asturies, ta per debaxo de la yá aprobada d'IX, que recueye la presentación d'un Plan de Llucha Contra'l Fraude, de manera participativa, y el reforzamientu de los servicios del Ente Tributariu asturianu (midida que yá ta en marcha). La iniciativa enmendada, a xuiciu d'IX, defende un modelu fiscal que nun algamar los estándares de la llucha contra'l fraude y de política fiscal de la izquierda.

La primer enmienda d'IX incorpora un nuevu puntu a les propuestes que la iniciativa plantega al Gobiernu d'Asturies nel que se-y pide que “potencie y reorganize l'Ente de Servicios Tributarios, los sos recursos humans y materiales y los sos llabores d'inspección, xestión y recaldación, emprestando especial atención a la deslocalización de contribuyentes y el tapecimientu de bienes”.

Por aciu otra enmienda preténdese tamién que'l Gobiernu d'Asturies ellabore y someta a un procedimientu de participación ciudadana pa la so aprobación antes del final d'añu “un Plan cuatrienal de Prevención y Llucha contra'l Fraude Fiscal n'Asturies que desenvuelva y sistematice los puntos anteriores y defina les midíes a tomar y márquese los oxetivos que pretenden consiguise, y a treslladalo a esta Cámara pal so alderique”

La siguiente enmienda, y yá nes reivindicaciones que se faen al Gobiernu del Estáu, modifica la propuestes de Podemos nel so puntu 2.2 incorporando la necesidá de que non yá l'Impuestu sobre'l Patrimoniu sinón el de Sucesiones y Donaciones aplicar de manera harmonizada en tol territoriu estatal,”potenciando la so utilidá recaldatoria y redistributiva” diz la enmienda, amás de la de control de les llamaes grandes fortunes.

Asina mesmu una nueva enmienda pretende que la reforma fiscal que tien d'encetase nesti país nun sía tantu pa simplificala (lo que casi siempres suel ser sinónimu d'amenorgar impuestos, anque esa nun fuera la intención del proponente) sinón p'amontar la progresividad del sistema y “que tienda a oldear rentes de capital y trabayu, amenorgar beneficios fiscales” .

Por aciu otra enmienda pretende correxise lo qu'ensin dulda tien de ser un erru de redacción yá que nel puntu 2.7 de la so propuesta Podemos solicita la revisión de la fiscalidá de les sociedaes d'inversión de capital variable, les conocíes popularmente como SICAV, cuando hai un consensu na esquierda de que lo más conveniente nesti casu ye dar en la so eliminación al ser sociedaes d'inversión onde s'abeluguen les grandes fortunes, y esi ye'l sentíu de la enmienda d'IX.

Otru cambéu impulsáu por Izquierda Xunida a la proposición pretende desaniciar un inesplicable olvidu na extensísima propuesta de Podemos en materia fiscal (que cunta con 19 puntos) y ye la que se refier a la necesidá de que'l conxuntu de los países de la UE incorporen un ambiciosu Impuestu a les Transacciones Financieres que tenga como prioridá amenorgar drásticamente la especulación nos mercaos financieros y que destine siquier la metá de los mayores ingresos xeneraos por esti impuestu a una retribución más social y equitativa de la riqueza ysobremanera, a financiar polítiques sociales específiques, la llamada tasa TOBIN que foi vetada mientres enforma tiempu por una Gran Bretaña qu'al haber decidío salise de la Unión yá nun ta en condiciones de bloquiar la so puesta en marcha.

Finalmente la última enmienda d'Izquierda Xunida encamienta al Conseyu de Gobiernu a “poner en marcha nel más curtiu periodu posible un programa d'información y sensibilización fiscal empobináu a distintos sectores de la ciudadanía na que s'espublicen los principios constitucionales de progresividad y suficiencia y esplíquese que'l destín de los impuestos ye financiar el modelu social de bienestar.”