Menu

El diputáu d'IX pide una Axencia Medioambiental que dependa de Presidencia

Ovidio Zapico, diputáu d'IX responsable de los asuntos de Medioambiente, considera que la nube tóxica qu'esta tarde soportaron los habitantes d'Avilés "ye una situación pergrave", daqué casi insólito na hestoria recién de la ciudá. Pal diputáu d'IX esta nube de gases acedos, como reconoz la empresa, representa una desdexación total del Gobiernu asturianu en materia de prevención y vixilancia ambiental, tal como vien denunciando Izquierda Xunida, qu'en repitíes ocasiones foi calificada d'alarmista per parte de la Conseyera Belén Fernández. "Güei constatóse la necesidá d'incluyir un plan de prevención de riesgos o/y l'establecimientu de protocolos, como esixen les iniciatives d'IX na Xunta Xeneral, pa que los ciudadanos, por casu, "sepan si pueden o nun salir a la cai, si salir o non con mázcaros.... ante estes anomalíes",alvierte'l diputáu d'IX. Güei, como en casi toles demás ocasiones d'inversión térmica, va ser l'agua la que salve a les autoridaes ambientales.

IX solicita yá la creación d'una Axencia Medioambiental que depende de Guillermo Martínez, conseyeru de Presidencia, y non de Belén Fernández na que "nun confiamos no que se refier al medioambiente", diz Zapico. "Güei más qu'en xineru ye más necesariu'l Pactu Anticontaminación y una bona forma ye empezar pol Observatoriu de la Sostenibilidá Ambiental como marco d'alcuerdu", esplica'l diputáu d'IX, quien yá s'axuntó colos axentes sociales y la Fade, que tán d'alcuerdu n'esquizar esta vía p'ameyorar el medioambiente asturianu.

Amás, el diputáu d'IX considera que tolos esfuerzos n'establecer una promoción de la marca Avilés" van ser infructuosos si danse estes nubes tóxiques que faen salir nos medios de comunicación como si fuera una ciudá china y non una ciudá del Paraísu Natural", que, a éstes tamién ta en peligru. "Estes semeyes con mázcaros superen les de les nubes de polvu de Xixón", conclúi'l diputáu d'IX.