En total 34 propuestes pa tratar d'amenorgar el varapalu de les cuentes del PP a Asturies, frutu de les cuites ente les dereches asturianes, el PP nacional y el PNV
Izquierda Xunida va presentar 34 enmiendes a los Presupuestos Xenerales del Estáu p'Asturies, pa tratar d'amenorgar el varapalu que suponen estes cuentes pa la Comunidá Autónoma. El coordinador xeneral, Ramón Argüelles, el diputáu, Gaspar Llamazares, y el voceru en Xixón, Aurelio Martín, refugaron la propuesta de gastu pal añu en cursu del Gobiernu del PP una y bones, aseguraron, respuenden les cuites y engarradielles de les dereches asturianes, qu'al pie de les dereches española y vasca de la PNV han amagüestado un proyectu nel qu'Euskadi se lleva “el cuponazo” dexando p'Asturies “la pedrea”.
Les crítiques d'IX Asturies respuenden a unes cuentes que suponen un nuevu retayu a la inversión estatal na rexón. Y ye que, enfatizó Argüelles, los presupuestos “baxen casi un 30% l'aportación del Estáu n'Asturies”, al pasar de los 307 millones d'euros de 2016 a namá 211 pal añu en cursu. La situación ye especialmente grave por culpa de que'l grau d'execución ye bien baxu, lo que significa una cayida entá mayor del gastu que, finalmente, va realizar l'Alministración central n'Asturies.
Gaspar Llamazares foi especialmente críticu con unes cuentes que calificó de “cortina de fumu” de Rajoy sobre los casos de corrupción del PP y, tamién, pa edulcorar los retayos. “Estos presupuestos signifiquen una prórroga de la prórroga recortada del añu pasáu, colo que tamos na metá de la metá presupuestaria pal conxuntu del país”. La situación ye entá más grave pal territoriu ástur, onde lo que se produz ye, a xuiciu del voceru d'IX na Xunta Xeneral del Principáu, que va ver nuevamente apostrada la obra de la variante de Payares.
La cuestión ye entá más grave, yá que se produz, amás, un ataque al financiamientu. Nesti sentíu, Llamazares aseguró que la negociación cola PNV foi otra hachada”: “que me respuenda daquién a qué vamos a axuntar sobre'l sistema de financiamientu de les Comunidaes Autónomes cuando se-y perdonó'l 40% del Cupu al Gobiernu Vascu. Yá teníen un sistema de financiamientu que privilexaba al País Vascu nun 20%, agora un 40% más. Qué vamos faer nel futuru modelu, cuando yá, prácticamente, ye una comida sirvida pol mercadéu del Partíu Popular y el Partíu Nacionalista Vascu”.
Los presupuestos afirmó'l coordinador xeneral, son la consecuencia de “les cuites qu'hai na derecha: la derecha d'Asturies, d'España y País Vascu”. Asina, ente que n'Asturies la inversión cai, n'Euskadi llogren fondos pa l'AVE (La denominada Y vasca). “Vemos como les negociaciones fueron en desterciu de les partíes que vienen p'Asturies”.
Gaspar Llamazares abondó nel crime presupuestariu que, dixo, tien con cómplices y autores: “l'autor ye'l PP y los cómplices son los partíos que voten a dos manos esti presupuestu. Y, n'Asturies, son claramente Foru y Ciudadanos, que dexen que, per una parte, haya un presupuestu demediado, retayáu nun 30%, que dexen que la Variante de Payares quede ad kalendas graecas, esto ye, nun sabemos pa cuando, prácticamente aplazada dos años; y, per otra parte, que dexen tamién, y nun salieron a la palestra a dicir nada, que dexen qu'haya un alcuerdu de cupu, o un cuponazo, col País Vascu y una pedrea pal restu de les Comunidaes Autónomes ysobremanera, p'Asturies”.
La responsabilidá nun ye única de los partíos de la derecha, como actores, principales o sencundarios, sinón tamién del propiu executivu de Javier Fernández, que la so actitú, dixo ye la de la denegación d'auxiliu” y que da la impresión de que “mira pa otru llau”. Nesti sentíu, esixó Llamazares al Gobiernu asturianu una actitú más firme y esixente en defensa de los intereses d'Asturies.
El voceru d'IX nel Conceyu de Xixón, Aurelio Martín, destacó les enmiendes que, de forma directa o indirecta, inciden nesi conceyu y que resumió nel Plan de Víes (15 millones d'euros), 1 millón d'Euros pa la rexeneración de la sablera de San Llorienzo, cubrimientu del puertu de Musel. Martín incidió tamién na importancia d'otres enmiendes de calter xeneral pero que, al so xuiciu, van tener tamién repercusión nel desenvolvimientu de Xixón, como la Variante de Payares, al puertu del Musel y a la Zalia. “Son enmiendes d'enforma caláu qu'afecten al desenvolvimientu económico y social tantu d'Asturies como de Xixón”.
Les enmiendes que se plantegen dende IX Asturies supondríen aumentar en más del doble de recursos que l'Estáu compromete p'Asturies, algamando los 450 millones d'euros, estructuraos en 6 exes básiques: axilización de la Variante Payares; modernización ferroviaria de cercaníes; Fondos Mineros, meyores na rede de carreteres xuntu al apantallamientu en zones residenciales; proyectos locales que riquen el sofitu del Estáu como la rexeneración de la sablera de San Llorienzo o'l cubrimientu de la zona carbonera del Musel; y planes d'empléu local y economía social.
Diputáu Autonómicu y Coordinador d'IX
Diputado Autonómico
(Mas Asturies)
Diputada Autonómica
Convocatoria por Asturies