Menu

El coordinador d'IX Asturies xunta güei cola alcaldesa del conceyu, Amor Ardura, con quien se comprometió a reclamar inversiones pindies de Fondos Mineros y del Principáu

El coordinador xeneral d'IX Asturies, Ramón Argüelles, reivindicó güei en Teberga la necesidá d'inversiones y servicios nes zones rurales pa evitar el despoblamientu de bona parte d'Asturies. Argüelles, que s'entrevistó cola alcaldesa del conceyu, María Amor Ardura, destacó l'esfuerzu de xestión que se ta faciendo nesi conceyu y que ye, dixo, un bon exemplu de cómo xestiona IX nos pequenos territorios: “en contactu colos vecinos, sabiendo les esmoliciones, sabiendo los problemes y, qué tanto, les necesidaes”.
 
El máximu responsable d'IX reclamó una apuesta clara, en forma d'inversiones y compromisos de les alministraciones públiques, tanto de la Central como de l'Autonómica, pa poner frenu a la paulatina “desertización” de les árees rurales. “A toos enllénasenos la boca falando de vivir nos pueblos pero, pa que la xente pueda vivir nos pueblos, hai que da-yos educación, hai que da-yos sanidá, hai que da-yos tresporte y hai que da-yos puestos de trabayu”. L'oxetivu d'IX, esplicó Argüelles, ye “siguir emburriando” por que los mozos de Teberga puedan tener emplegu y porque les inversiones pindies “nesti paraísu natural, reserva de la biosfera” puedan producir y xeneren riqueza.
 
Pela so parte, María Amor Ardura, pidió sofitu pa resolver les necesidaes de los vecinos en materia de comunicaciones, tanto les físiques, “forfugando” al Principáu p'acometer les meyores yá comprometíes, como les virtuales, al traviés d'internet. “Tener unes bones comunicaciones, nestos momentos, significa poder atraer xente y aumentar la población, yá que puede trabayase ensin nengún problema al tar en conexón con #cualquier llugar del mundu”.
 
Pero les necesidaes, más allá del mundu virtual, tamién tán nes infraestructures básiques rimaes, como'l saneamientu o les carreteres. Tratase de proyectos y obres a financiar bien al traviés de Fondos Mineros, bien al traviés d'inversiones del Principáu d'Asturies.
 
Sía que non, enfatizó Ardura, “la esmolición máxima ye la de los nuesos mozos: si nun hai trabayu nel mediu rural, los mozos tienen que dise”. Nesi sentíu, l'alcaldesa añedió que con una población tan avieyada como lo ta'l campu asturiano, les perspectives nun son bien bones polo que reclamó persistir nel trabayu empobináu a la creación d'emplegu por que “haya futuru”.
 
Na xunta de trabayu, tamién tuvieron Gabriela Álvarez, Juan Ponte y los conceyales teberganos Juan José García y Adrián Gayo.