Menu

Llamazares anuncia una cincuentena d'enmiendes ente les qu'inclúi una "llínea caliente" virtual y la posibilidá de denuncies anónimes pa facilitar la llucha contra actos ilícitos na vida pública

Izquierda Xunida va proponer la puesta en marcha d'un plan de prevención y un mapa de riesgu como alternatives p'ameyorar la tresparencia y prevenir la corrupción. El voceru de la formación na Xunta Xeneral del Principáu, Gaspar Llamazares, presentó'l xueves en rueda de prensa una cincuentena d'enmiendes coles que se busca algamar el máximu grau d'alcuerdu p'ameyorar la calidá democrática y l'enfotu nes instituciones.

Les propuestes d'IX inclúin elementos de propuestes d'otros partíos. Nesti sentíu, Llamazares esplicó que con ello s'escuerre algamar el mayor grau de consensu en redol a la llucha contra la corrupción

"La corrupción, nestI momentu'l casu Hulla y demás casos que se tán dando nel nuesu país, non solamente tán produciendo alarma social, Sinón que deterioren la imaxe de la democracia de les instituciones", aprofió'l voceru d'IX pa quien la gravedá d'esta amenaza" esixe la busca del máximu consensu.

Ente les midíes p'ameyorar la tresparencia, IX inclúin tamién como una novedá un cambéu nel silenciu alministrativu. Si, nestos momentos, la falta de respuesta de l'Alministración presupon, en sí mesmo, xuna forma de contestación anque negativa pa quien realizó la demanda, IX propón qu'esi silenciu conviértase en positivu, de forma que s'obligue a l'Alministración a ufiertar finalmente una respuesta.

La llucha contra la corrupción ye, pa IX, indispensable si, de verdá, pretende entrase nuna nueva era de tresparencia. Con esti fin, plantega completar la oficina antifraude con una oficina virtual que protexa al demandante, incorporando amás la denuncia anónima, como vía pa sacar a la lluz episodios corruptos. Trataríase, esplicó Llamazares, de poner en marcha una "llínea caliente" en forma de portal virtual que facilite les denuncies.

La rueda de prensa de Llamazares coincidió cola fin de la fracasada moción de censura contra Mariano Rajoy y el gobiernu del PP. A pesar de que finalmente la iniciativa se malograre, Gaspar Llamazares enfatizó en que, siquier, sirviera p'abrir un nuevu escenariu d'entendimientu ente la fuerces de cambéu. Sicasí aprofió que, inda, "hai enforma que faer nel diálogu de la izquierda y son necesarios alcuerdos básicos".