L'oxetivu ye evitar "la seca" ensin perder ayudes, al igual que yá fixo Galicia
Izquierda Xunida va presentar una proposición non de llei p'afaer los periodos de verificación de los cultivos pa les ayudes del pagu verde a les distintes realidaes del campu asturiano. Con esta fin, encamiéntase al Conseyu de Gobiernu d'Asturies por que la fecha de verificación seya del 15 de xineru al 15 d'abril, con vixencia a partir del próximu añu. El cambéu de fecha obedez a la necesidá, nes zones de la rasa costera, d'un plantíu tempranu del maíz pa evitar los meses de "la seca". El coordinador xeneral, Ramón Argüelles, manifestó'l so respaldu a los pidimientos de bona parte de les esplotaciones de la rasa costera, cola presentación de la iniciativa na ganadería Urbasa, de Gozón, una de les afectaes pol actual sistema, frutu, esplicó, "d'una mala decisión del Principáu d'Asturies, qu'esperemos que pueda ser iguada".
"Tamos énte un sector fundamental p'Asturies, una Asturies que fai 30 años tenía 30.000 esplotaciones y qu'agora apenes llega a les 2.000, un sector onde se tán produciendo 600.000 tonelaes de lleche al añu y nel qu'hai cobertoria pa muncho más, y un sector que, de nun ser por estes ayudes, como tien munchos problemes pa remocicar nun va poder ser", esplicó Argüelles.
Sía que non, pal coordinador d'IX, ye imprescindible buscar alternatives pa caltener y desenvolver el campu asturiano, tanto porque significa emplegu, como pola actividá económica directa ya inducida y, añedió, por cuestiones medioambientales.
La PNL, esplicó la vicepresidenta primera de la Xunta y diputada d'IX María José Miranda, trata de dar respuesta a un problema que tien efectos negativos pal sector agroganadero. El cultivu de branu, señaló, "n'Asturies nun se dexa (pa poder aportar a les ayudes verdes o greening) hasta'l 15 de mayu, una fecha qu'impon la Unión Europea pero que sí la Conseyeria tenía la posibilidá de pidir al Ministeriu un adelantu de la llantadera al 15 d'abril, daqué que fixo Galicia y que la nuesa conseyera, por tar pensando n'otres coses o por non tar sollerte a la problemática que tienen los ganaderos, sobremanera, de la zona costera nun realizó a tiempu".
PolA sO parte, la vocera d'IX en Gozón, Pilar Suárez Huerga, amosó'l so prestu por esta iniciativa yá que tien efectos directos nesta actividá que supon, nel conceyu, un 33% del conxuntu de la so economía.
Diputáu Autonómicu y Coordinador d'IX
Diputado Autonómico
(Mas Asturies)
Diputada Autonómica
Convocatoria por Asturies