Menu

La eurodiputada d'IX, que va ser ponente d'un informe sobro'l papel de les rexones y les ciudaes na implementación de los alcuerdos de la COP21, acusa a Donald Trump de “tar echando per tierra décades de trabayu” pa protexer el clima La eurodiputada d'Izquierda Xunida

Ángela Vallina afirmó esti llunes que la Unión Europea tien de caltener un compromisu infrayable na llucha contra'l cambéu climáticu”, como contraposición a EEXX, que'l so presidente, Donald Trump, decidió salir de los alcuerdos alcanzaos en París n'avientu de 2015 na COP21.

“Tamos énte un problema urxente d'orde internacional y dende la UE tenemos de caltener el nuesu compromisu na llucha contra'l cambéu climáticu, daqué que la ciudadanía europea reclama mayoritariamente”, dixo mientres un seminariu sobro Política de cohesión y cambéu climáticu que celebró la comisión de Desenvolvimientu Rexonal (REGI) de la Eurocámara.

Vallina, qu'empezó a preparar el so informe pal Parlamentu Européu sobro El papel de les rexones y les ciudaes de la Unión Europea na implementación de los alcuerdos COP21, criticó la decisión personal” de Trump y acusó al inquilín de la Casa Blanca de “tar echando per tierra alcuerdos internacionales y décades de trabayu pol caltenimientu del nuesu planeta”. “Xuna potencia mundial que reniega de compromisos cruciales pa la sostenibilidá y supervivencia, poques llecciones puede danos”, añedió.

La eurodiputada d'IX abogó, sicasí, porque la Eurocámara “calténgase firme nos compromisos ya intelixente nes decisiones”. Pa ello, esplicó, “tamos preparando esti informe dende REGI”, un informe “que pretende apigurar y reordenar les directrices de los alcuerdos internacionales y europeos qu'afecten a les ciudaes y a les rexones na llucha contra'l cambéu climáticu”. Tratar de “identificar midíes reales a nivel de gobernanza, acciones y recursos” que puedan contribuyir a cumplir los oxetivos de la COP21.

Pa ello, esplicó Vallina, “non yá vamos cuntar cola ayuda d'espertos na ellaboración del informe, sinón que pretendemos llanzar un ampliu procesu de participación ciudadana” una y bones los europeos y europees “tienen enforma que dicir sobro cómo quieren vivir, cómo quieren entamar les sos ciudaes, el mediu de tresporte qu'usen acaldía, la calidá del aire qu'alienden, el tipu d'enerxía que peracaben y xuna llarga llista de decisiones de mayor o menor orde qu'afecten día ente día al calentamientu global”.

“Pretendemos – sintetizó- abrir un gran procesu participativu a la sociedá civil entamada nel so conxuntu”, por que “apurran idees, esperiencies y propuestes concretes” y esto ayude “a tresmitir la relevancia del problema, a consolidar la validez de les decisiones que se tomen y a concenciar a la ciudadanía de los cambeos que como sociedá tenemos de faer pa protexer el medioambiente”.