Menu

El voceru d'IX amuesa la so esmolición porque la permanencia de la colección d'arte n'Asturies nun tea asegurada

Gaspar Llamazares, voceru parlamentariu d'IX na Xunta Xeneral, amosó güei la esmolición y malestar del grupu por que los que realmente tienen la mayor parte de les acciones de Liberbank nun puedan actuar na Fundación Bancaria Caxastur primero que se tomaren les decisiones importantes. Nesti sentíu pidió faer efectiva la participación del 30% como entidá fundadora, nel casu de la Xunta Xeneral, pa exercer la sensibilidá llaboral, territorial y cultural que perdió Caxastur na so conversión en Liberbank. Llamazares ufiertó estes palabres na intervención de la comparecencia de Jaime Montalvo como representante de la Xunta Xeneral na Fundación Bancaria Caxastur. “Les fuerces polítiques tendríamos de cavilgar sobro cómo se participa nun bancu priváu onde hai una participación accionarial alta porque los intereses públicos tienen que tener mayor representación”, alvirtió.

El voceru d'IX amosóse partidariu de que Jaime Montalvo compareza dacuando na Xunta Xeneral pa conocer les llínees que va llevar el representante de la Xunta Xeneral en Patronatu.

Al respective de la Obra social, Llamazares sorrayó qu'hai necesidá, pola evidencia, de modificar los estatutos porque la Fundación Bancaria nun puede funcionar como un "club priváu”, nun puede tener derechu vetu de les sos entidaes fundadores, nin puede haber incompatibilidaes ente los sos miembros. De la mesma, fixo especial fincapié na colección Caxastur, que la so permanencia, al so xuiciu, nun ta garantizada y reclamó “especial atención” al Gobiernu asturianu porque ye patrimoniu cultural del conxuntu d'Asturies.

De la mesma, denunció que les Caxes llegaron a tener nes sos fundaciones 2.600 millones d'euros y agora tamos en 600 y picu millones. L'añu pasáu la Fundación de l'antigua Caxa solo dedicó 465.000 euros, auditados, como consta na so web: 250000 destinaos a acción social, 200.000 a proyectos educativos y 15.000 a cooperación. Tamién punxo n'evidencia que frente a estos datos, apocayá la Caixa robló col Principáu un conveniu por valor de 4 millones d'euros. “ Tamos perdiendo compromisu territorial y bancariu y, amás, el calter de la fundación bancaria ye bien minoritariu pa les prioridaes d'Asturies”, denunció.