Menu

Pulgar demanda un calendariu de negociación y llograr un conveniu colectivu propiu

La Conseyera de Derechos Sociales, Pilar Varela, reconoció esta mañana la necesidá d'ameyorar les relaciones llaborales na Fundación Fasad énte la entruga de la diputada d'IX, Marta Pulgar, sobro qué midíes piensa tomar énte'l deterioru de la situación llaboral na Fundación Asturiana d'Atención y Protección a Persones con Discapacidáes y/o Dependencies. Varela aseguró que la so prioridá ye establecer una relación de puestos de trabayu clara, cuidando que l'anterior negociada tien “rabicos” y que'l patronatu yá decidió la contratación d'un director de recursos humanos, amás d'abrir una nueva bolsa d'emplegu. La conseyera punxo como fecha tope de les negociaciones el 30 de setiembre.

Marta Pulgar demandó qu'esti procesu llegue a bon términu, pero recordó la manifestación de 80 trabayadores el día 23 de xunu que reivindicaben una fundación tresparente, por unes meyores condiciones de trabayu, por unes retribuciones xustes y pola estabilidá nel emplegu … “reivindicaciones más qu'atinaes porque desgraciadamente nesta fundación pública nun se da”. Ye más, dixo Pulgar, unes reivindicaciones que “tienen moho” porque lleven dos años aparcaes.

Pulgar recordó que la bolsa d'emplegu tien una regulación, un reglamentu de 2016, qu'en Fasad nun s'aplica y que'l comité d'empresa lleva años pidiendo'l so cumplimientu. “Esos visos d'entrada arbitraria tienen de sumir d'una vegada”, demandó la diputada d'IX, al igual que les contrataciones en fraude de llei. Tamién denunció que ye “sangrente” la tema de les retribuciones, una y bones munchos trabayadores cobren el 50% menos qu'otros y otres que faen les mesmes funciones n'otres instituciones públiques.

Pulgar reconoció que la paciencia por que la Conseyería lleve a cabu estes cuestiones “escosar polo que pidió poner enriba de la mesa'l puntu final y soluciones concretes. Demandó un calendariu concretu pa poner “pates arriba la política de personal anque nun sía senciellu y por que se roble un conveniu colectivu propiu”. “Ensin priesa pero ensin posa”, esixó.