Menu

La coalición propón establecer pasiellos de preferencia ciclista, el llume de túneles, carriles bici d'accesu a centros educativos, amás de normes de convivencia ente los distintos usuarios de les víes

El grupu parlamentariu d'IX enmendará el proyectu de llei de Tresporte y Movilidá Sostenible que tien series faltes en distintes árees, por casu nel usu de la bicicleta, pero tamién nos planes de movilidá, en midíes d'accesibilidá, nel derechu d'accesu, o na ausencia de clauses de contratación. Asina lo adelantraron esta mañana'l voceru parlamentariu d'IX, Gaspar Llamazares, y el responsable d'Infraestructures, Ovidio Zapico, qu'anunciaron propuestes concretes p'ameyorar la convivencia ente los distintos usuarios de les víes públiques, favoreciendo l'usu de la bicicleta.

Para Gaspar Llamazares la llei mentada podría denominase d'inmovilidá, porque ye una llei antigua y nun enceta aspeutos fundamentales de la movilidá como los mentaos enantes. A xuiciu d'Ovidio Zapico el proyectu fai bien poques referencies a la bicicleta y nun dedica nengún apartáu. IX cree necesario articular midíes concretes y que esto s'afigure nun capítulu completu de la mentada llei. IX enmendará esta llei por que recueya, amás de midíes y campañes informatives, otres más concretes. Ente estes postreres ye necesario falar de midíes físiques como por casu marcaxe de pasiellos de preferencia ciclista, en víes que cunten con alternatives pa los turismos y el tresporte, en carreteres onde esisten autovíes alternatives, como yá esisten n'otros países europeos; tamién naquelles onde se vaigan a faer reformes integrales habría qu'incorporar estos elementos pa garantizar la convivencia ente distintos usuarios de les víes; pide tamién ser esixentes nel llume de túneles en carreteres con mayor presencia de ciclistes; construyir carriles bicis o carriles con accesu a centros educativos; amás d'establecer midíes educatives pa la convivencia ente ciclistes y senderistas cuando comparten espacios, por casu como asocede na Sienda del Osu. Tou ello en cooperación con federaciones de ciclismu y de monte, esplicó'l diputáu na rueda de prensa qu'ufiertaron na Xunta Xeneral.

L'oxetivu últimu de les enmiendes a la llei de Tresporte y Movilidá Sostenible, como aseguró'l diputáu Zapico esta mañana ye xenerar un usu atentu per parte de toos nes carreteres o siendes, qu'eviten enfrentamientos que se tán dando ente distintos usuarios de la vía, como por casu l'allugamientu de chinchetes nel Altu de la Madera, la pasada fin de selmana. Ovidio Zapico tamién sorrayó la medría de la práctica ciclista que se ta produciendo nos últimos años y refirióse al usu de la bicicleta como saludable, amás de ser un mediu de tresporte sostenible, al pie de los indicadores económicos que xenera y la incidencia turística que podría tener p'Asturies. De la mesma, resaltó la medría alarmante desgraciadamente, del númberu d'accidentes con ciclistes implicaos. Según la DXT los accidentes de ciclistes crecieron un 185% ente 2006 y 2016. L'añu pasáu finaron 53 ciclistes n'España. Hasta xunu d'anguaño finaron 26 persones, una d'elles n'Asturies.